Президент Шавкат Мирзиёев раислигида озиқ-овқат хавфсизлигини таъминлаш ва ички бозорда нарх-наво барқарорлигини сақлаш чора-тадбирлари юзасидан видеоселектор йиғилиши ўтказилгани ҳақида хабар берилганди.
Йиғилишда ички бозорни озиқ-овқат маҳсулотлари билан тўлдириш, нарх-наво барқарорлигини сақлаш масалалари муҳокама қилинган.
«Бугундан барча чораларни кўриб, амалдаги тизимни ўзгартирмасак, эртага қиш ва баҳор ойларида қийин бўлади. Озиқ-овқат маҳсулотларини кўпайтириб, бозордаги нарх-навони арзон қилсак, одамларни, айниқса, кам таъминланганларни рози қила оламиз», – деган Шавкат Мирзиёев.
Шунингдек, видеоселекторда ҳар бир вилоят, туман ва шаҳар ҳокимида ҳудуд аҳолисининг кейинги йил майгача гўшт, тухум, ун, ёғ, шакар, гуруч, картошка, сабзи ва пиёзга бўлган эҳтиёжи, бу маҳсулотларни қачон, қаердан олиш бўйича аниқ ҳисоб-китоб бўлиши кераклиги таъкидланган.
«Аҳолини озиқ-овқат маҳсулотлари билан узлуксиз таъминлаш, нарх барқарорлигини сақлаш бўйича вазифалар белгилаб олиниши керак. Нарх-навонинг ошиши аҳолининг норозилигига сабаб бўлмоқда. Ҳаммаси жойлардаги раҳбарларнинг жиловни бўш қўйиб, ушбу йўналишдаги ишларни мукаммал йўлга қўймаганидан келиб чиқмоқда. Охирги уч йил ичида озиқ-овқат, мева-сабзавотчилик ва қишлоқ хўжалигининг бошқа тармоқларини ривожлантиришга 28 триллион сўм кредит маблағи ажратилган. Бунақаси тарихда бўлмаган. Чорвачилик йўналишининг ўзида 11 триллион сўмлик лойиҳалар амалга оширилган. Вилоят, туман, шаҳар раҳбарлари, жойлардаги банкларнинг филиаллари раҳбарлари 19 октябргача сўнгги уч йил давомида амалга оширилган ишлар ҳақида мижозбай ахборот киритади. Озиқ-овқат, яъни гўшт, тухум, ўсимлик ёғи ва шакар маҳсулотларининг нархи кескин ўзгариши ҳудуд ва секторлар раҳбарларини қаттиқ ташвишга солиши керак эди. Аммо ҳеч бир раҳбар бу ҳақда гапирмаяпти, бонг урмаяпти. Бозорнинг директори маҳсулот нархини қанча кўтарса, шунча кўп даромад кўради. Бу на прокуратура ва на департамент назоратига олинган? Департамент энди озиқ-овқат саноати ва хавфсизлиги масалалари билан шуғулланади. Ҳамма вилоят ҳокимлари душанбагача қарор қабул қилсин, сешанба ёки чоршанба куни халққа мурожаат қилиб 2021 йил май ойигача вазият қандай бўлиши ҳақида маълумот беради. Барча озиқ-овқат маҳсулотларининг захираси бўлиши керак, бу давлат сиёсатига айланиши лозим», – деган Шавкат Мирзиёев.
Изоҳ (0)