Тошкент вилоятининг Нурафшон шаҳрида Нидерландиядаги Lumidea Engineering қурилиш компанияси томонидан ишлаб чиқариш заводи барпо қилинади. Бу ҳақда Тошкент вилояти ҳудудий электр тармоқлари корхонаси ОАВ вакиллари учун уюштирган пресс-турда маълум қилинди, дея хабар бермоқда «Дарё» мухбири.
Таъкидланишича, лойиҳа қиймати 29 миллиард 600 миллион сўм бўлиб, завод 5 гектар ер майдонида бунёд этилади. 2021 йилнинг март ойида ишга туширилиши режалаштирилаётган ишлаб чиқариш объектида 200 нафарга яқин ишчи ўрни яратилади.
«Вилоят бўйича жами 534 минг дона таянч устунлар мавжуд. Шундан 277 минг донадан зиёди симёғочлар бўлиб, уларни бетон устунларга алмаштириш зарур. Республикамиздаги бир қанча ишлаб чиқариш заводларидан ҳафтасига 20-30 дона бетон устунлар харид қиляпмиз. Аммо бу жуда оз ва биз бундан қаноатланмаяпмиз. Бу кетишда Тошкент вилоятидаги эҳтиёжни қондириш учун узоқ йиллар кутишимизга тўғри келади.
Ходимлар билан маслаҳатлашиб, вилоятда бетон устунлари ва кабель маҳсулотлари ишлаб чиқаришни режалаштирдик. Лойиҳамиз вилоят ҳокимига ҳам маъқул келди.
Таҳлил қилиб кўрсак, битта бетон устунни бошқа заводлардан бир миллион 100 минг сўмга харид қилсак, янги қуриладиган корхонада бир дона бетон устун 580 минг сўмга тайёр бўларкан. Кунига 64 дона маҳсулот ишлаб чиқариш кўзда тутилган. Бундан ташқари, бошқа вилоятларга ҳам буюртма асосида маҳсулот етказиб бериш ниятимиз бор», — деди Тошкент вилояти ҳудудий электр тармоқлари корхонаси раҳбари Нилуфар Ботирова.
Ботированинг қўшимча қилишича, янги заводда йилига 20 минг дона жаҳон стандартларига жавоб берадиган электр бетон устуни, Европа тажрибаси асосида 5 минг километр кабель маҳсулотлари ҳамда 150 минг дона изолятор ва 12 минг дона траверс ишлаб чиқарилади.
Изоҳ (0)