Дексаметазон – COVID-19 га қарши курашда самарали экани исботланган ягона дори воситаси. Бу ҳақда Жаҳон соғлиқни сақлаш ташкилоти (ЖССТ) раҳбари Тедрос Гебрейесус маълум қилди, дея хабар бермоқда «РБК».
«Айни пайтда кортикостероид дексаметазон оғир касалликка чалинган беморларда COVID-19’га қарши самарадорлигини кўрсатган ягона терапевтик восита», – дейди ЖССТ раҳбари.
Гебрейесус пандемия бошида умидли деб ҳисобланган икки дори воситаси – ремдесивир ва интерферон самарасиз бўлиб чиққанини таъкидлади. У июнь ойида ЖССТ касалликка қарши курашда гидроксихлорохинни, июлда эса лопинавир ва ритонавир комбинациясини қўллаш бўйича тадқиқотларни тўхтатганини таъкидлади.
«Ҳозирда ўтказилган оралиқ тадқиқотлар натижалари шуни кўрсатадики, тадқиқотдаги иккита препарат, яъни ремдесивир ва интерферон коронавирус сабаб келиб чиқадиган ўлим ҳолатларининг олдини олишга ёки касалхонада қолиш муддатини қисқартиришга ҳеч қандай таъсир кўрсатмайди», – дейди Гебрейесус.Дексаметазон – 1960 йиллардан бери қўлланиладиган яллиғланишга қарши ва иммунодепрессив дори. Одатда тизимли эритематоз касалликларни даволаш учун ишлатилади. Бундан ташқари дори воситаси бодибилдингда мушак массасини кўпайтириш учун допинг сифатида ишлатилиб, машҳурликка эришган.
Ташкилотнинг маълум қилишича, дексаметазонни қабул қилиш сунъий нафас олдириш ускунасига уланган беморларда ўлим ҳолатларини учдан бирга, кислородли терапияга муҳтож беморлар орасида эса бешдан бирга камайтирган.
Ташкилот дорини нисбатан хавфсиз, деб атади. Аммо у аҳволи ўрта ва енгилроқ бўлган беморлардан кўра кўпроқ оғир аҳволдаги беморларга ёрдам бериши таъкидланди.
Маълумот учун, дексаметазон АҚШ президенти Дональд Трампни даволашда ҳам ишлатилди.
Изоҳ (0)