Шарқона «люкс»: Турк актрисалари қизил йўлакда ва кундалик ҳаётда қандай кийинади? (фото)

Ижро маҳорати ва ўзига хос гўзаллиги билан минглаб мухлислар қалбидан жой олган турк актрисалари кундалик ва тадбирларда қандай услубда кийинишни ёқтириши уларнинг дидига боғлиқ.

Марям Узерли

Ҳаётда Марям оддий ва қулай кийинишни яхши кўрадиган аёл. Тақдирлаш маросимларида эса ҳақиқий Хуррам султонга айланади.

Қўл иши билан безалган башанг либослар, кенг юбка, қимматбаҳо тошли тақинчоқлар унинг образини ташкил этади.

Демет Оздемир

«Тонг қуши», «Қулупнай ифори» юлдузи кундалик ҳаётда қоматни акс эттирадиган кийимларни кийишни ёқтиради. Калта юбка, «разрез»ли либос, шорти ва топлар шулар жумласидан.

Пошнали туфлиларни актриса фақатгина зиёфатларга кийиши мумкин, кундаликда эса қулай пойабзаллар ботинка, этик ва кроссовкаларни афзал билади.

Неслиҳан Атагул

«Севги изтироби»дан кейин машҳурликка эришган актриса, одатда, жинси шим, легинс, кенг свитер, эркин бичимли шим ва спорт услубидаги оёқ кийим кийиши мумкин. У ортиқча макияж қилмаслик ва сочларини номига жингалак қилиш орқали табиий гўзаллигига урғу беради.

Алоҳида тадбир ва зиёфатларга ипак, тилларанг ёки ялтироқ матодан тикилган ҳашаматли либосларни маъқул кўради.

Мелиса Асли Памук

Асли йирик кроссовка, ботинкалар, кенг шим ва принтли футболка ҳамда эркакларникига ўхшаш толстовкалар кияди. Унинг гардеробида, асосан, қора рангдаги либос, занжирли тақинчоқ ва браслетларни учратиш мумкин. Тақдирлаш маросими ва зиёфатлар учун ҳам актриса қора либос ёки кам деталли костюм танлайди.

Хазал Фелиз Кучюкёсе

Хазалнинг кийинишида сўнгги трендларни кўриш мумкин. У ранглар билан ўйнаб, спорт ва романтик услубни комбинация қила олади.

Тадбирларга Хазал ҳар бир деталгача эътибор берилган ҳолда қомати ва кўринишидан келиб чиқиб кийинади.

Ханде Эрчел

«Маликам, энди қара», «Эшигимни қоқ» сериаллари юлдузи ранг-баранг кийинишни яхши кўради. Унинг гардеробида блузкалар, гулли кўйлаклар ва миди юбкани кўрса бўлади. Алоҳида кун ёки оқшом учун актриса ултразамонавий костюм ва кўйлаклар, тилларанг калта либос ва смокинг кийиши мумкин.

Фаҳрие Эвжан

Бурак Ўзчивитнинг рафиқаси ҳам кундалик ҳаётда қулай кийинишни хуш кўради. Пошнали пойабзалларни алоҳида кунларда, кундалик учун кроссовка ва ботинка кияди.

Зиёфат, тадбир ва тақдирлаш маросимларида эса уни қоматга урғу берадиган кўйлак ва ингичка пошнали туфлида кўриш мумкин.

Ханде Доғандемир

«Қуёшни кутиб», «Муҳташам юз йил» ва «Кўсем» сериалларида рол ижро қилган актриса маълум услуб асосида эмас, нимани ёқтирса шуни кияди.

Алоҳида тадбир ва зиёфатлар учун эса табиий рангдаги либос билан аксессуарлардан фойдаланади.