Самарқандда бувисининг 40 минг доллар пули ва 10 минг долларлик тақинчоқлари учун босқинчи ёллаган аёл қўлга олинди

Самарқанд шаҳрида бувиси ва тоғасининг уйидан 40 минг доллар пули ва қиймати 10 минг доллар бўлган тақинчоқларни олиб чиқиш учун одам ёллаган 25 ёшли аёл қўлга олинди. Бу ҳақда Самарқанд вилояти ИИБ ахборот хизмати хабар берди.

Маълум қилинишича, 2020 йил 28 сентябрь куни Самарқанд шаҳар «Сартепо» маҳалласида яшовчи 25 ёшли Б. исмли аёл бувиси билан ўзининг оиласи ўртасида келишмовчилик борлиги сабабли бувиси ва тоғасининг уйида бўлган 40 минг доллар ва 6-7 турдаги тахминий баҳоси минг 10 долларлик тилла тақинчоқларни қўлга киритиш учун одам ёллаган. Аёл ўзининг таниши А.га бувисининг уйига босқинчилик уюштиришни буюртма қилиб, агарда пул ва қимматбаҳо бойликларни олиб чиқса, ишни тугатганидан сўнг унга жиноий йўл билан қўлга киритилган пуллардан 10 минг доллар беришни ваъда қилган.

Аёл ёлланма босқинчига уйнинг ички тузилишини чизиб бериб, ўзи билан бирга бувисининг манзилига олиб борган ва узоқдан уйнинг кириш дарвозасини кўрсатган. Шу тариқа, аёл келгусида содир этилиши керак бўлган ўта оғир турдаги жиноий режани тузган.

Ҳолат тўғрисида олинган тезкор маълумотга асосан, 2020 йил 3 октябрь куни ДХХ вилоят бошқармаси ва Самарқанд шаҳри бўйича ИИО ФМБ Жиноят-қидирув бўлими ходимлари томонидан тезкор тадбир ўтказилиб, Б. ёлланма босқинчи билан такрорий учрашган вақтида қўлга олинган.

Мазкур ҳолат юзасидан Самарқанд шаҳри бўйича ИИО ФМБ ҳузуридаги Тергов бўлими томонидан Ўзбекистон Республикаси Жиноят кодексининг 164-моддаси 4-қисми «а» (жуда кўп миқдорда содир этилган босқинчилик) банди билан жиноят иши қўзғатилиб, тергов ҳаракатлари олиб борилмоқда.