Мадуро Трампга, «у Венесуэланинг душмани бўлса ҳам», саломатлик тилади

Венесуэла президенти Николас Мадуро коронавирусга чалинган АҚШ раҳбари Дональд Трампга соғайишни тилади. Бу ҳақда Мадуронинг ўзи маълум қилди, деб ёзади «РИА Новости».

«Биз бирор киши ҳам касалланишини хоҳламаймиз, биз АҚШ президентига одамгарчилик юзасидан бирдамлик билдириб қоламиз, у Венесуэла душмани бўлса-да, соғайиб кетишини истаймиз», — деди Мадуро Twitter орқали трансляция қилинган соғлиқни сақлаш бўйича йиғилишда.

Маълумот учун, Дональд Трамп коронавирус инфекциясидан «Дексаметазон» стероид препаратини қўллаган ҳолда даволанмоқда. У оғир ҳолатдаги беморларга бериладиган доридир.

Эслатиб ўтамиз, Дональд Трамп ва унинг рафиқаси Меланияда 2 октябрь куни коронавирусга топширган тест жавоби ижобий чиққан. Ҳозирда у Уолтер Рид номидаги миллий ҳарбий-тиббий марказ (Мериленд штати, Бетесда шаҳрида жойлашган)да даволанмоқда.

Аввалроқ, АҚШ президенти Дональд Трамп ўз тарафдорлари билан учрашиш учун бироз вақтга шифохонани тарк этгани хабар берилган эди.

Шунингдек, АҚШ президенти Дональд Трамп коронавирусга топширган биринчи тестининг жавоби ижобий чиққанини яширгани маълум бўлди.