Табиат ҳамиша ўз мўъжизалари билан инсонларни ҳайратга солиб келади. Сизни таништирмоқчи бўлганимиз ана шундай мўъжизалардан яна бири АҚШда жойлашган Йосемите миллий боғи ҳисобланади.
4 октябрь ҳар йили ушбу маскан очилган кун сифатида нишонлаб келинади. «Дарё» сана муносабати билан боғ ҳақида маълумот ҳамда форожамланма тақдим этади.
Йосемите миллий боғи тарихи
Йосемите миллий боғи (Yosemite National Park) – АҚШдаги энг гўзал табиатга эга қўриқхоналардан бири. У Калифорния штатидаги Сьерра-Невада тоғ массивида жойлашган. 1984 йилдан бери ЮНЕСКО уни ҳимоясига олган.Йосемите миллий боғи 3 026 км² майдонни эгаллайди. Ушбу улкан ҳудудда сайёҳлар беқиёс гранит қояларни, ажойиб водийлар ва яйловларни, шаффоф кўллар ва дарёларни, шаршараларни, шунингдек, ҳайвонлар ва қушлар, ўсимликларнинг кўплаб турларини учратади.
Боғнинг тарихига тўхталадиган бўлсак, апаче қабиласи ҳиндуларининг тилида «йосемите» сўзи «гризли айиғи» деган маънони англатади.
Боғнинг ҳозирги гўзаллиги XIX аср ўрталарида кашф этилди. Бу ноёб майдон минг йиллар олдин улкан континентал музлик таъсири остида пайдо бўлган деб қаралади.
1850 йилларда Йосемите водийси жуда машҳур дам олиш масканига айланди. 1890 йил октябрь ойида боғ миллий мақомга эга бўлди. Кейинчалик Йосемите миллий боғи хусусий мулкдорлардан сотиб олинган ерлар ҳисобига бир неча бор кенгайтирилди.
Иқлими
Йосемите боғи Ўрта ер денгизи иқлим зонасида жойлашган. Бу шуни англатадики, ёғингарчиликнинг катта қисми қишда бўлади, қолган фасллар деярли қуруқ кечади. Ўртача кунлик ҳарорат −3,9 дан 32,2 °C гача ўзгариб туради ва ҳарорат пасайиши баландлик ошиши билан бошланади. Ёздаги юқори ҳарорат, намликнинг пастлиги ва чақмоқ сабаб тез-тез ёнғинлар келиб чиқади.Йосемитенинг диққатга сазовор жойлари
Йосемите боғи улкан тоғлар, шаршаралар, дарёлар, ўрмонлар ва ўтлоқлар билан ўралган. У ерда сайёҳлар учун барча шароитлар яратилган, пиёдалар ва велосипед йўллари мавжуд, тўхташ жойлари қулайлиги билан ажралиб туради.Ҳар йили миллий боққа беш миллионга яқин одам ташриф буюради; сайёҳларнинг 90 фоизи фақат Йосемите водийсини кўриш учун келади. Чунки водий боғнинг марказий қисмида – гўзал Мерсед дарёси бўйида жойлашган ва диққатга сазовор жойларга тўла. Айнан шу ерда сиз деярли бир километр баландликдаги Эль-Капитан гранитли тош монолитни, чиройли кўллар ва шаршараларни, турли ҳайвонларни учратасиз.
Асосий сайёҳлик йўналишлари Йосемите водийсидан бошланади. Бу ерда бутун инфратузилма жойлашган – қаҳвахона, дам олиш жойлари ва дўконлар ҳам сайёҳлар билан тўла.
2015 йилдан 2017 йилгача боғ атрофида сайёҳлар учун қулайликлар яратиш бўйича яна қайта ишлар олиб борилди, бунинг натижасида трамвай йўллари олиб ташланди ва пиёдалар учун қулай асфальт йўллар пайдо бўлди.
Қуйида боғнинг гўзалликларини ўзида мужассам этган фотосуратлар билан танишасиз.
Изоҳ (0)