Польшалик ёзувчи Тадеуш Доленг-Мостович асари асосида режиссёр Ежи Гофман суратга олган «Табиб» фильми 1982 йилда намойиш этилди. Оғир жароҳат олиш натижасида хотирасидан айрилган, оиласидан узоқда яшашга мажбур бўлган варшавалик жарроҳнинг тақдири ҳақидаги фожиали воқеа томошабинларнинг кўнглида алланечук туйғуларни уйғотган.
Фильм чиндан ҳам ХХ асрда суратга олинган картиналар ичида энг яхшиси, деб тан олинган. Чунки бу ўша оғир сиёсий даврда ҳукм сурган синовлардан сўнг яхши натижа эди. Профессор Вилчурдан ташқари, бош роль унинг қизини ижро этган актрисага ҳам топширилди. Ёқимтой Мариса образида гавдаланган Анна Димна фильм намойишидан сўнг минглаб томошабинлар меҳрини қозонди. Актрисанинг кейинги ҳаёти қандай кечгани эса унинг мухлислари учун ҳамон қизиқ.
Болалик ва театрга йўл
Бўлажак актриса 1951 йил Польшанинг ғарбидаги Легнице шаҳарида туғилган. Онаси балетни жуда яхши кўргани учун ҳам қизини жуда ёшлик чоғидан ушбу санъат билан таништиришга ҳаракат қилди. Эҳтимол, у ўзи эриша олмаган орзуларига Аннани етиштиришни ўйлагандир. Шунинг учун ҳам она ва боланинг театр томошаларига ташрифи тез-тез рўй берар эди. Чиндан ҳам Анна аста-секин санъатга меҳр қўя бошлади, лекин у онасининг орзусидан бироз бошқача, драматик актрисаликка қизиқишини билдирди. Табиийки, онаси бундан бироз ранжиди ҳам.
Бироқ қизнинг келажак учун амалга оширган танловига ҳеч ким тўсқинлик қилмади. У олийгоҳга ўқишга кириб, аъло баҳоларга тамомлади. Ёш, чиройли ҳамда иқтидорли актриса дарҳол Краков эски театрига қабул қилинди. Актриса ушбу иш жойини кейинчалик ҳам ўзгартирмади ва ҳанузгача у ерда фаолият юритади. У ўзининг севимли спектаклларида иштирокини давом эттириб, айни дамда ўз тажрибасини ёш актёрлар билан бўлишмоқда, шунингдек, Краков универстетида дарс ҳам беради.
Актрисанинг спектакл ва фильмдаги роллари 250 дан ортиқ. 1990 йил ёзувчи Михаил Булгаковнинг «Уста ва Маргарита» асари асосида экранлаштирилган фильмда ҳам роль ижро этди.
Актрисага мислсиз даражада шон-шуҳрат келтирган фильм бу – «Табиб» картинасидаги Мариса образи бўлди. Асар сюжети режиссёр ҳамда маҳоратли актёрлар ижроси туфайли бадиий жиҳатдан юксак санъат асарига айланди.
Фильм ўзининг ажойиб воқелиги билан мухлислар ҳамда танқидий баҳолаганлар хотирасида сақланиб қолган. Шунингдек, ушбу картина учун актрисалар ичида танлаб олинган Анна Димнанинг ижроси ҳам муҳим эди.
Актрисанинг фожиаси
Актрисанинг айтишига қараганда, унинг биринчи турмуш ўртоғи Веслав Димна унинг карьерасини шакллантиришга катта таъсир кўрсатган. Польшанинг таниқли актёри ва сценарийлар муаллифи Веслав Димна интилувчан ёш актриса учун жуда катта кўмак берган. «Табиб» фильми суратга олиш ишларидан аввал Веславнинг вафот этиши актрисанинг ўз қаҳрамони Мариса тақдирига ҳамдард бўлишига туртки бўлди.
Анна орадаги 15 ёш фарққа эътибор бермай, 1973 йил турмуш қургандан сўнг актриса Димна фамилиясига ўтган. Улар биргаликда узоқ яшамади, орадан беш йил ўтиб, Веслав юрак хуружидан вафот этди. Аммо у бўлажак актрисанинг ижодига ижобий таъсир ўтказишга муваффақ бўлган эди.
Инсонлар учун холис хизмат
Анна турмуш ўртоғининг фожиасидан сўнг узоқ вақт мобайнида яна саҳнага қайтиш учун ўзида куч топа олмади. Актрисанинг таъкидлашича, ўша пайтда бошқа роль ўйнай олмайдигандек туйилган, лекин унинг касби фақатгина барчасига чидаш кераклигини эслатган.
Аммо ногиронларга бағишланган хайрия тадбирлари давомида у санъат касал инсонлар ҳаётини янада ёринроқ ва қизиқарли қилишига ишонч ҳосил қилди. Шундан сўнг у ўз касбидан инсонларга ёрдам бериш сифатида фойдаланди ва хайрия ишларига бор эътиборини қаратди.
Орадан беш йил вақт ўтиб актриса иккинчи бора турмуш қуришга қарор қилди. Унинг Збигнев Шота билан никоҳидан ўғли Михаил дунёга келди. Аммо жуфтлик орасидаги кўплаб келишмовчиликлар олти йиллик никоҳдан кейин ажралишга олиб келди.
Унинг учинчи турмуш ўртоғи кўплаб хайрли ишларига шерик, актёр ва режиссёр, Краков театри директори − Кшиштоф Оржеховский. Улар биргаликда турли хил хайрия тадбирларида иштирок этади.
Актриса Анна Димна нафақат мамлакатдаги ажойиб бадиий фаолияти билан, балки ақлий нуқсонга эга бўлган ногиронларга ёрдам бериш учун яратилган фонд туфайли кўплаб одамларнинг ҳурматига сазовор бўлган. У мунтазам равишда хайрия концертларини уюштиради ва бу сабабдан ўзини бахтли актриса деб билади.
Изоҳ (0)