Қозоғистонда ўлим жазоси бекор қилинди. Олдинроқ мамлакатда ушбу жазони қўллаш тўхтатиб қўйилган эди. Бу ҳақда Қозоғистон Ташқи ишлар вазирлигига таяниб, Tengrinews хабар берди.
Маълумотга кўра, Қозоғистон ўлим жазосини бекор қилиш бўйича халқаро протоколга қўшилган. Тегишли ҳужжат Қозоғистоннинг БМТдаги доимий вакили Қайрат Умаров томонидан БМТнинг бош қароргоҳида имзоланган.
Мамлакат президенти Қосим-Жўмарт Тўқаев ушбу қарор ҳақида БМТ Бош Ассамблеясининг 75-сессиясидаги чиқишида маълум қилиб, мамлакат инсоннинг ҳаётга бўлган ҳуқуқини таъминлашни мақсад қилиб қўйганини айтган эди.
Қозоғистонда ўлим жазосини белгилаш 2003 йилда мамлакат президенти қарори билан тўхтатиб қўйилган эди.
Маълумот учун, Ўзбекистонда ўлим жазоси 2008 йил 1 январдан бошлаб бекор қилинган.
Изоҳ (0)