Қашқадарё ҳокимининг собиқ ўринбосари Сирожиддин Азизов 45 ёшида коронавирус асоратларидан вафот этди. Бу ҳақда вилоят ҳокимлиги хабар берди.
Маълум қилинишича, марҳум 2020 йил 23 сентябрь куни оламдан ўтган.
Сирожиддин Азизов Зоир Мирзаевнинг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари лавозимида ишлаган.
Вилоят ҳокимлиги ахборот хизмати раҳбари Аҳрор Содиқовнинг «Дарё»га қўшимча қилишича, Азизов вафотига қадар вилоят юқумли касалликлар шифохонасида даволанаётган бўлган.
Эслатиб ўтамиз, Сирожиддин Азизов вилоят ҳокими ўринбосари лавозимидан 2020 йилнинг 5 август куни бўшатилган бўлиб, вилоят уй-жой коммунал хизмат кўрсатиш бошқармаси бошлиғи лавозимига тайинланганди.
Вилоятда соғлиқни сақлаш бошқармаси бошлиғи ўринбосари Шерали Нурматов 61 ёшда, Ғузор туман тиббиёт бирлашмасининг собиқ бош шифокори Тўрақул Холиқов 65 ёшда, Ўзбекистон Бош прокуратураси Қамоққа олинганларни сақлаш ва жазони ижро этиш жойларида қонунларга риоя этиши устидан назорат бўйича Қарши прокурори Деҳқонбой Абдуллаев 46 ёшда, Миришкор тумани ҳокими Ғайрат Бегалиев вафот этгани хабар берилса-да, марҳумларнинг вафоти сабаби коронавирус билан боғлиқлиги расман «тан олинмаганди».
Изоҳ (0)