«Барселона» португалиялик ҳимоячи Нелсон Семедуни Англиянинг «Вулверҳэмптон» клубига сотиб юборди. Бу ҳақда каталонияликлар расмий сайти хабар берди.
26 ёшли Семеду «Вулверҳэмптон» клуби билан 2023 йил ёзига қадар мўлжалланган битим имзолади. Томонлар келишувни 2025 йил ёзига қадар узайтириш имкониятини ҳам шартномада қайд этиб ўтган.
«Барселона» Нелсон учун 30 миллион еврога эга бўлади. Бундан ташқари турли натижаларга қараб каталонияликлар яна 10 миллион евро бонусга эга бўлиши мумкин. Нелсон Семеду «Барселона» сафида уч мавсум ҳаракат қилиб, 122 та ўйинда иштирок этди.
Шу тариқа «бўрилар» сафидаги португалиялик футболчилар сафи яна биттага кўпайди. «Вулверҳэмптон» сафидаги португалиялик футболчилар: Родерик Миранда, Даниэль Поденсе, Рубен Невеш, Рубен Винагре, Руи Патрисиу, Педро Нету, Жоау Моутинью, Фабио Сильва, Витор Феррейра ва Нелсон Семеду.
Эслатиб ўтамиз, аввалроқ «Барселона» чилилик ярим ҳимоячи Артуро Видални «Интер»га сотиб юборган эди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)