Бухоро вилоятида ИИБнинг хизмат итлари кўмагида 56 та ўғрилик ва 24 та гиёҳвандликка оид жиноят иши фош этилган. Бу ҳақда «Дарё»га хабар берган ИИБ ахборот хизматининг таъкидлашича, Жондор туманидаги ўғрилик иши ҳам хизмат ити ёрдамида топилган.
Таъкидланишича, 2020 йилнинг 14 сентябрь куни Жондор туманида яшовчи 27 ёшли М.Т. маҳалладоши М.И.нинг яшаш уйидан салкам 600 минг сўмлик уй-рўзғор буюмларини ўғирлаган.
Ҳолат ИИБга маълум бўлгач, тезкор тергов гуруҳи ишга киришган. Гуруҳ таркибида Рекс лақабли хизмат ити билан вилоят ИИБ Патруль пост хизмати ва жамоат тартибини сақлаш бошқармаси Кинология хизмати кичик инспектор-кинологи Ашраф Қиличов ҳам бўлган.Ашраф Қиличов хизмат ити билан ўғрилик қилгани гумон қилинган М.Т.ни қўлга олган.
М.Т. қўлга олингач, унга нисбатан Жиноят кодексининг 169-моддаси 3-қисми «а» банди (такроран ёки хавфли рецидивист томонидан ўғрилик) билан жиноят иши қўзғатилган. Ҳозирда дастлабки тергов ҳаракатлари олиб борилмоқда.
«Инспектор-кинолог Ашраф Қиличовга Рекс лақабли хизмат ити олти ойлигидан бошлаб бириктирилган ва у айни пайтда 2,5 ёшда. Унинг кўмагида бир нечта ўғрилик жиноятлари фош этилган. Вилоятда ИИБ Пост патруль хизмати ва жамоат тартибини сақлаш бошқармаси Кинология хизмати питомникида яна 65 та хизмат ити сақланмоқда», — дейди кинология хизмати фаолиятини мувофиқлаштириш бўлими бошлиғи Дамин Мўминов.
Дамин Мўминовга кўра, 2020 йилнинг айни пайтига қадар вилоятда хизмат итлари кўмагида 56 та ўғрилик ҳолатлари аниқланиб, гиёҳвандликка оид 24 та жиноят фош этилган.
Изоҳ (0)