Аргентиналик ҳужумчи Гонсало Игуаин «Ювентус»ни тарк этди. Бу ҳақда Турин клуби расмий сайтида хабар қилинди.
Таъкидланишича, томонлар ўзаро келишув асосида шартномани бекор қилган. Игуаин эркин агент мақомини олиб, бошқа клуб сафига бепул ўтиши мумкин.
Эслатиб ўтамиз, аввалроқ футболчи Американинг «Интер Майами» клуби билан икки йиллик шартнома имзолагани ва унинг йиллик маоши 7,5 миллион евро бўлиш ҳақида хабар берилганди.
32 ёшли Игуаин «Ювентус» сафида 149 ўйин ўтказиб, 66 гол ва 16 голли узатмага муаллифлик қилган. Гонсало «кекса синьора» билан уч марта Италия чемпионатида, икки бор эса мамлакат кубогида ғалаба қозонган.
Мавзуга доир:
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)