Ўзбекистонда масжидлар сони 2075 тага етди

Самарқандда янги масжид рўйхатдан ўтказилди, деб «Дарё»га хабар бермоқда Адлия вазирлиги.

Қайд этилишича, шу кунгача мамлакатда 2292 та диний ташкилот фаолият юритиб келаётган бўлса, улардан 2074 тасини масжидлар ташкил қиларди.

Самарқанд вилоят адлия бошқармаси томонидан 2020 йилнинг 17 сентябрида «Янгиобод» жоме масжиди 321-сон билан давлат рўйхатидан ўтказилиши натижасида Ўзбекистонда масжидлар сони 2075 тага етди.

Маълум қилинишича, масжид Самарқанд шаҳар «Машъал» МФЙда жойлашган.

Маълумот учун, шу кунга қадар, Самарқандда жами 808 та нодавлат нотижорат ташкилоти ва 309 та диний ташкилот рўйхатдан ўтказилган бўлиб, шундан 287 та исломий йўналишдаги ва 22 та ноисломий йўналишдаги диний ташкилотлар ҳисобланади.

Аввалроқ Юқори Чирчиқ тумани, Олмалиқ шаҳри, Сурхондарё вилоятида янги масжид очилгани маълум қилинганди.

Шу билан бирга, Самарқандда 7,5 минг намозхонга мўлжалланган вилоятдаги энг катта масжид қуриб битказилгани хабар берилган эди.