Тошкент ерусти ҳалқа метро линияси остидаги ер участкалари аукционга қўйилади. У ерда кафе, ресторан ва дўконлардан иборат ободонлаштирилган жойлар пайдо бўлади, йўлларнинг кенгайтирилиши ҳисобига эса сайр қилиш зоналари ва велосипед йўлаклари қурилади. Бу ҳақда Яшнобод тумани ҳокими Бахтиёр Раҳмонқуловга таяниб, «Ўзбекистон 24» телеканали хабар берди.
Маълум қилинишича, «Дўстлик-2» ва «Қўйлиқ» станциялари орасидаги барча ҳудуд тўлиқ ободонлаштирилади ва зарурий инфратузилма билан таъминланади.
«11 километрдан ортиқ жойни 6 та лотга бўлиб чиқдик. Бунинг натижасида 153 161 квадрат метрли жойлар ҳосил бўлди. Замонавий метрога мос дўконлар қурилиши керак, шу сабабли бу ерда турли кўринишдаги кичик дўкончалар бўлмайди. Барчаси Оҳангарон шоссесидан Роҳатгача бўлган ягона концепция асосида қурилади», — дейди туман ҳокими.
Оҳангарон шоҳкўчаси бўйлаб эса параллел автотураргоҳга эга 10 метрли алоҳида автомобиль йўлларини қуриш режалаштирилган. Шунингдек, йўлнинг қарама-қарши тарафида сайр қилиш ва велойўлаклар учун ҳам 10 метрли янги йўл полотноси ажратилади.
Ҳокимнинг қўшимча қилишича, аҳоли, тадбиркор ва инвесторлардан келиб тушадиган талаб ҳамда эҳтиёжларга қараб бу ердан ўрин оладиган савдо объектлари, умумий овқатланиш муассасалари фоизлари ҳисоблаб чиқилади. Лотларнинг барчаси аукцион орқали сотилади.
Эслатиб ўтамиз, 29 август куни Тошкент метроси Юнусобод йўналишида янги икки станция — «Юнусобод» ва «Туркистон» иш бошлаган эди, 30 август куни тонгдан эса «Дўстлик-2» ва «Қўйлиқ» станциялари оралиғидаги янги ерусти метро йўли ишга тушди.
Изоҳ (0)