Фарғона ва Андижон вилоятларида ОТМларга қабул учун тест синовлари якунланди. Бу ҳақда хабар берган «Дарё» мухбирларининг ёзишича, икки вилоятдан ОТМларга ҳужжат топширган абитуриентларнинг 10 599 нафари турли сабабларга кўра имтиҳонларда қатнашмаган.
Қайд этилишича, Фарғонада олий таълим муассасаларига ҳужжат топширган 122 минг 729 нафар абитуриентнинг 117 минг 424 нафари тест синовларида иштирок этган. 6 нафар абитуриент тана ҳарорати юқори бўлганлиги учун тест синовларига киритилмаган. 94 нафар абитуриент эса имтиҳонга уяли телефон, қўлбола электрон қурилма ёки «шпаргалка» олиб киришга урингани учун тест синовидан четлаштирилган.
Андижонда ўтказилган тест синовларида эса 5294 нафар абитуриент қатнашмаган. Қоидаларни бузган 116 нафар абитуриент синовлардан четлаштирилган. Бу ҳақда «Дарё»га хабар берган Давлат тест маркази Андижон вилояти бўлими бош мутахассиси Рустамжон Азимовнинг айтишича, тест топшириши белгиланган 96 738 нафар абитуриентдан 91 444 нафари тестда иштирок этган. Ҳужжат топширган 5294 нафар абитуриент номаълум сабабларга кўра тест синовларига келмаган.
Эслатиб ўтамиз, Ўзбекистон ОТМларига кириш имтиҳонлари учун рўйхатдан ўтган 1 304 194 нафар абитуриентдан 63 580 нафари, яъни 4,9 фоиз абитуриент турли сабабларга кўра тест синовларида қатнашмаган. 90 нафар абитуриент тана ҳарорати юқорилиги сабабли тест синовларига киритилмаган.
Изоҳ (0)