Давлат божхона қўмитаси 3,8 млрд сўмлик утилизация йиғимларини четлаб ўтишга уриниш ҳолатлари бўлганини маълум қилди

Утилизация йиғими бевосита транспорт воситаларини «эркин муомалага чиқариш» божхона режимига расмийлаштириш жараёнида ундирилиши белгиланган. Лекин айрим уддабурон шахслар томонидан мазкур йиғимни четлаб ўтишга бўлган уринишлар ҳам учраб турибди, дея хабар қилган Давлат божхона қўмитасининг матбуот хизмати.

Эслатиб ўтамиз, Вазирлар Маҳкамасининг 2020 йил 2 июндаги «Ғилдиракли транспорт воситалари, ўзиюрар машиналар ва уларнинг тиркамалари учун утилизация йиғимини жорий этиш тўғрисида»ги 347-сонли қарорига асосан 1 августдан бошлаб автотранспорт воситаларини расмийлаштиришда утилизация йиғими жорий этилган.

Қўмита матбуот хизматининг хабарига кўра, Тошкент шаҳар божхона бошқармаси «Арк булоқ» ташқи иқтисодий фаолият пости ходимлари томонидан 46 дона Hyundai русумли транспорт воситасини «Эркин муомалага чиқариш» божхона режимига расмийлаштириш учун тақдим этилган электрон божхона юк декларацияси маълумотлари ўрганилганда мазкур транспорт воситалари учун ундирилиши керак бўлган 3 миллиард 385 миллион сўмлик утилизация йиғими божхона декларациясида кўрсатилмагани аниқланган.

Тошкент шаҳар божхона бошқармаси Контрабандага қарши курашиш ва божхона аудити бўлими ходимлари томонидан «Тошкент товар» ташқи иқтисодий фаолият божхона постида божхона юк декларацияси маълумотлари ўрганилганда эса 5 дона Yutong автобуси ҳамда 5 дона JАC микроавтобуслари учун 419,2 миллион сўм утилизация йиғими кўрсатилмагани маълум бўлган.

Мазкур постда аниқланган яна бир ҳолатда KIA Bongo юк ташишга мўлжалланган автотранспорт воситасини «Эркин муомалага чиқариш» божхона режимига расмийлаштириш учун электрон тақдим этилган божхона юк декларацияси маълумотлари ўрганилган. Божхона юк декларациясида 46,3 миллион сўмлик утилизация йиғими кўрсатилмагани аниқланган.

«Натижада салкам 3,8 миллиард сўмлик утилизация йиғимларининг давлат бюджетига ундирилмай қолинишининг олди олинди. Мазкур ҳолатлар юзасидан божхона органлари томонидан суриштирув ҳаракатлари давом эттирилмоқда», – дейилади қўмита матбуот хизматининг хабарида.