Sharp компанияси энг «тезкор» экранга эга янги смартфонини тақдим этди

Янги Aquos Zero 5G Basic смартфони Full HD-сифатли 6,4 дюймга тенг OLED-дисплейга эга бўлди, бироқ унинг асосий ўзига хослиги — янгиланиш частотасининг 240 герцли тенглигида, деб хабар беради Hi-Tech.Mail.ru.

Дисплейнинг янгиланиш частотаси экрандаги тасвир сониясига неча маротаба янгиланишини кўрсатади. Стандарт кўрсаткич 60 герц бўлиб, у тасвир тиниқ бўлиши учун етарли ҳисобланади. Бироқ янгиланиш частотасининг оширилиши тасвирни янада тиниқлаштиради ва сезгирлигини оширади. Бу биринчи навбатда геймерлар учун керак, бироқ мазкур технология борган сари смартфонларга ҳам жорий этилмоқда. Бунга қадар рекорд кўрсаткич — 144 герцга тенг эди.

Қолган жиҳатлари билан Aquos Zero 5G Basic ўрта даражадаги смартфонлардан фарқ қилмайди. У Snapdragon 765G процессори, 6 гигабайт тезкор ва 64 гигабайт ички хотирада ишлайди. Аккумулятор сиғими эса 4050 мА/соатга тенг, бироқ у юқори янгиланиш частотани қандай уддалаши номаълум.

Sharp ҳозирча ўзининг янги смартфони нархини эълон қилмаган.

Аввалроқ Xiaomi компанияси 2400х1080 пикселли ҳамда 120 герц частотали 6,67 дюйм экранга эга бўлган Poco Х3 NFC ҳамёнбоп смартфонини тақдим этганди.