Бухорода 306 миллион сўмлик кислород ишлаб чиқарувчи ускунани ўғирлаган шахс қўлга олинди. Бу ҳақда ИИВ ҳузуридаги Тергов департаменти хабар берди.
Маълум бўлишича, 2020 йилнинг январь ойидан 27 июль кунига қадар бўлган вақт оралиғида номаълум шахс Вобкент тумани «Работохун» МФЙ да жойлашган кислород ишлаб чиқариш шохобчасида ўрнатилган кислород ишлаб чиқариш ускунасини яширин равишда талон-торож қилиб, ҳодиса жойидан яширинган. Ушбу ускуна нархи 306 миллион 312 минг сўм бўлиб, 64 ёшли И.А.га тегишли бўлган.
Ҳолат юзасидан Вобкент тумани ИИБ ҳузуридаги Тергов бўлими томонидан Жиноят кодексининг 169-моддаси 4-қисми «а» банди (жуда кўп миқдорда ўғирлик) билан жиноят иши қўзғатилган.
Олиб борилган тезкор-қидирув ҳаракатлари натижасида жиноятни 50 ёшли А.И. содир этганлиги аниқланиб, гумон қилинувчи тариқасида жалб қилинган ва процессуал тартибда ушланган. Ўғирланган ускуна эса Хоразм вилояти Урганч шаҳрида фаолият олиб бораётган МЧЖ ҳудудида эканлиги аниқланиб, ўрнатилган тартибда расмийлаштирилиб олинган.
Айни пайтда тергов ҳаракатлари давом этмоқда.
Изоҳ (0)