Ўзбек мигрантлари учун Ўзбекистоннинг Россиядаги элчихонасида касб ва тил ўргатишга мўлжалланган тўгараклар йўлга қўйилади. Бу ҳақда пандемия шароитида иқтисодий ўсишни таъминлаш мувзусидаги матбуот анжуманида Бандлик ва меҳнат муносабатлари вазирлиги бошқарма бошлиғи Темур Маҳмудов маълум қилди.
Пандемия эрта баҳор ойларига тўғри келганлиги сабабли 500 мингдан ортиқ мавсумий мигрантлар чет давлатларга ишга кета олмади. Бу билан Ўзбекистонда ишсизлар сони кескин ошиб кетди. Олдинги йиллар маҳаллий меҳнат бозорида мавсумий ишчилар сони 10-11 минг бўлган бўлса, айнан пандемия сабабли бу йил 100 мингача оширдик. Бундан ташқари четга кетаётган мигрантларни касб ва тилга ўргатиш бўйича ҳам вилоят, туман марказларида тўгараклар жорий қилинди. Мигрантларнинг асосий қисми Россия, Қозоғистон, Жанубий Кореа ва Европа давлатларига кетишаётгани учун, шу давлатларнинг тили ўргатилади. Буларнинг сонини йил якунига қадар 136 тага етказиш кўзда тутилмоқда. Шунингдек, хорижга ишлашга кетган ва ишини йўқотган Ўзбекистон фуқароларини иш билан таъминлаш бўйича ҳам ишлар олиб борилмоқда. Хусусан, Ўзбекистоннинг Россиядаги элчихонасида ва бошқа бир касбга доир ўқув марказлар билан шартнома қилган ҳолда тўгараклар йўлга қўйилади. Бу тўгараклар Ўзбекистонда «темир дафтар»да турадиган фуқаролар учун бепул тарзда амалга оширилади.Тадбирда айтилишича, мигрантларнинг асосий қисми Россияда ишлаётганлиги учун бу тизим бошлаб шу давлатда йўлга қўйилади ва кейинчалик бошқа давлатларда ҳам амалга оширилади.Темур Маҳмудов, Бандлик ва меҳнат муносабатлари вазирлиги бошқарма бошлиғи
Изоҳ (0)