Бу ҳақда 2020 йил 7 сентябрь куни АОКАда бўлиб ўтган матбуот анжуманида Марказий банк раиси ўринбосари Беҳзод Ҳамроев маълум қилди. Унга кўра, 2020 йилнинг ўтган саккиз ойида инфляция кўрсаткичи ўтган йилги билан солиштирганда 11,6 фоизни ташкил қилган.
«Аввалроқ йил якунигача инфляция кўрсаткичи 11-12,5 фоиз даражасида бўлиши прогноз қилинган эди. Ҳозирда йил охиригача 11 фоиз атрофида инфляция бўлишини кутяпмиз. 2019 йилда бу кўрсаткич 15,2 фоиз бўлган. Кўрсаткич ўтган йилгига нисбатан 4 бандга пасайиши кутилмоқда. Кейинги йилда инфляция кўрсаткичида 10 фоиз, 2023 йилда 5 фоизлик таргетга эришиш режалаштирилган», — деди Беҳзод Ҳамроев.
«Одамлар топаётган даромадниниг қадри бўлиши керак. Бир йилда ишлаб топган маблағингизнинг миқдори қанчалиги эмас, шу пулга нималар сотиб олиш мумкнилиги муҳимроқ. Макроиқтисодий барқарорликнинг асосий маъноси одамлар ишлаб топган даромаднинг қадрини ушлаб қолишдир», — дейди Беҳзод Ҳамроев макроиқтисодий барқарорлик, инфляция даражасини ушлаб туриш қанчалик муҳимлиги ҳақида.
Матбуот анжуманида пандемия даврида аҳолига ёрдам тариқасида қанча кредит маблағи кечиктирилгани айтиб ўтилди.
«Карантин даврида хўжалик юритувчи субъектлар, одамлар даромадини йўқотди. Аммо кредит олганлар бор, буни тўлаш керак. Шу нуқтаи назардан, 26,5 триллион сўм қийматидаги кредитларни тўлаш муддати 2020 йил 1 октябргача кечиктирилди. Бунда юридик шахсларнинг 21,3 триллион сўм миқдоридаги кредитлари кечиктирилган бўлиб, бу улар олган жами қарзларнинг 65 фоизини ташкил қилади. Кредит олган жисмоний шасхларнинг 88 фоизи кечиктириш имтиёзидан фойдалангани натижасида 5,3 триллион сўм миқдоридаги қарзнинг тўлаш муддати узайтирилди», — деди Беҳзод Ҳамроев.
Изоҳ (0)