Бир нечта йирик авиакомпаниялар клапани бор ниқоб ёки респираторда саёҳатга отланган йўловчилар самолёт бортига чиқарилмаслиги ҳақида огоҳлантирди, деб хабар беради Аvianews.
Бу каби авиаташувчилар қаторидан Air Canada ҳамда таркибига Lufthansa, Austrian Airlines ва Swiss кирувчи Lufthansa Group ўрин олган.
Клапанли ҳимоя воситалари уни тақиб юришни қулайлаштиради ва йўловчига ҳавони фильтрдан ўтказиб беради, бироқ ташқарига чиқарилаётган нафасни тозаламайди. Шундан қилиб, ниқоб бошқа саёҳатчилар ҳимоясини таъминламайди. Авиакомпаниялар клапанли ниқобларни тақиқлаш тўғрисидаги қарорини айнан шу билан изоҳламоқда.
Lufthansa Group, шунингдек, юздаги шаффоф ниқоблар бурун ва оғизни ёпувчи ниқоблар ўрнини босмаслигига эътибор қаратган. Бу каби ҳимоя экранлари йўловчи юзидан тўғридан-тўғри чиқувчи ҳаво оқимидаги томчиларнинг тарқалишини блоклайди, бироқ ён томонлардан ҳимоя таъминланмаган.
Ниқоблардан фойдаланиш касал йўловчидан инфекциянинг тарқалиш хавфини камайтириши ёки олдини олиши керак. Коронавирус кўпчиликда белгисиз ўтаётгани сабаб кўплаб мамлакатларда оғиз ва бурунни ёпувчи воситалардан фойдаланиш катта ёшли йўловчилар учун мажбурий қилиб қўйилган.
Айрим авиакомпаниялар эса тиббий сабабларга кўра ниқоб тақмасликка рухсат беради, бироқ бунинг учун шифокор рухсатини тақдим этиши ва парвоздан олдин коронавирусга тест топшириш лозим.
Аввалроқ Австралиянинг Янги Жанубий Уэльс университети олимлари COVID-19 пандемияси даврида коронавирус инфекциясидан ҳимояланишда энг яхши самара берадиган тиббий ниқоб қандай бўлиши лозимлиги тўғрисида маълумот берганди.
Изоҳ (0)