ХХ аср охирларида Aston Martin Lagonda устида ишлаган дизайнер Уильям Таунсон томонидан яратилган Interstyl Design фирмаси Hustler кит-карларини сотган. Эътиборли жиҳати, харидор фақатгина чизмаси учун пул тўлаган, кузов деталлари ва ҳаракатга келтирувчи қисмларни ўзи мустақил тайёрлаган. Жами 500 нусха Hustler сотилган ва ҳозирда улардан бири Stonecoldclassics сайти орқали 11 минг еврога сотилмоқда, деб хабар беради Motor.
Бугунги кунда Hustler нусхаларнинг тайёр вариантидан нечтаси сақланиб қолгани номаълум, бироқ уларнинг ҳар бирининг қўлда йиғилгани кит-карларни нафақат ноёб, балки эксклюзив моделга айлантиради. Сотувга қўйилган намунани 1982 йилда мистер ва миссис Шепартлар йиғган бўлиб, улар автомобилда 8,4 минг километр йўл босган.
Автомобиль кузови ва салони кемаларни ясашда ишлатиладиган фанерлардан тайёрланган, узатмалар ва агрегатлари Mini’ники, олд оптикаси Hillman Avenger’га, орқа фаралари эса Triumph Dolomite’га тегишли. Шунингдек, Diat Strada, Mini Cooper (олд тормоз дискалари), Citroen, Daimler Sovereing (олд ўриндиқлар), Wood&Pickett (руль) деталларидан ҳам фойдаланилган.
Эълон муаллифининг ёзишича, автомобиль идеал ҳолатда, шунингдек, у кўрсатилган техник хизматлар бўйича ҳисобни ва зарур ҳужжатларни тақдим этишга ваъда берган. Бундан ташқари, машинанинг бўлажак эгасига Уильям Таунсон томонидан имзоланган хат ва 1980 йилларда чоп этилган автомобиль журналлари жамланмаси тақдим этилади.
Изоҳ (0)