Чедвик Боузман чиндан ҳам истеъдодли ҳамда ёрқин юлдузга айланган актёрлардан бири эди. Унинг ҳар бир роли томошабинлар қалбидан жой олди. Афсуски, «Қора пантера» фильмининг бош қаҳрамони энди йўқ, уни фақат эсдалик бўлиб қолган фильмдаги роллари орқали кўриш мумкин, холос. 28 август куни саратон касаллиги оқибатида вафот этган таниқли актёрнинг ҳаёт ва ижод йўлига назар ташлаймиз.
Ёшлиги
Кичкинтой Чедвик АҚШнинг Жанубий Каролина штатида яшовчи оддий оилада дунёга келган. Ота-оналар фарзандига ҳамиша энг яхшисини беришга ҳаракат қилди. Отаси кичик тадбиркорлик билан шуғулланар, онаси эса ҳамшира бўлиб ишлаган.
Кейинчалик Чедвикнинг сўзларига кўра маълум бўлгандики, у қора танли бўлганлиги учун кўп жойларда таъқибларга учраган. Табиийки, бундай ҳолатлар унинг ҳудудида тез-тез учраб турган.
Мактабни тугатганидан сўнг Чедвик режиссёрлик фаолияти бўйича таълим олди. Аммо актёр бу билан қониқмади ва Драма академиясининг аспирантура босқичида ҳам ўқиди. У актёрликда тўхташни истамаган бўлса-да, вақт ўтиб, бор эътиборини айнан шу соҳага қаратди.
Бундан ташқари юлдуз ёшлигидан баскетбол билан шуғулланар эди ва бу унинг карьерасида ҳам ёрдам берди.
Карьераси
Таълим олиш жараёни тугаганидан сўнг Чедвик мутахассислиги бўйича иш бошлади, у телевизион фильм ва сериаллар учун сценарийлар ёзди. Кейинчалик у ўзини актёр сифатида синаб кўришга қарор қилади.
Фақатгина сериаллардаги бир нечта ролларидан сўнг у катта экранларда кўринди. Масалан, «42» картинасида бош ролни ижро этди. Кастингдан сўнг дарҳол бош ролга тасдиқланганига қарамай, у ўша пайтда ҳам актёрликдан воз кечиш ва ўзини режиссёрлик ҳамда саҳналаштиришга бағишлаш ҳақида ўйлар эди.
«42» картинасидан сўнг актёр бир нечта роллар ижро этди. Аммо «Капитан Америка: Биринчи қасоскор» фильмидаги Қора пантера роли унинг карьерасида муҳим воқеа бўлиб қолди. Картина намойишидан сўнг ҳам у бир неча бор Marvel’нинг фильмларида суратга тушди. Улардан яна бир машҳури 2018 йилги «Қора пантера» фильми бўлди.
Актёрнинг сўнгги ижроси Спайк Ли образи бўлиб, бу роль «Бир хил қоннинг бештаси» фильмида ижро этилганди. Айнан шу фильмда Чедвикни ташвишга солган ирқчилик муаммоси ёритилган.
Шахсий ҳаёти ва оғир касаллик
Боузманнинг ўлимидан кейин журналистлар унинг ҳаётини чуқурроқ ўрганиб, актёрнинг ҳеч кимга ошкор қилмай уйланганини аниқлади. Чедвикнинг кўнгил қўйган инсони Тэйлор Симона Ледвард эди. Улар беш йилча учрашиб юрган. Жуфтлик 2019 йилнинг октябрида никоҳдан ўтган.
Маълумотларга кўра, 2016 йил актёрнинг соғлиғида муаммолар пайдо бўлган ва унга йўғон ичак саратони ташхиси қўйилган. Актёр касалликка қарши жасорат билан курашди ва бу ҳақда бирор марта жамоатга очиқламади. Аммо сўнгги вақтларга бориб, мухлислари юлдузни қандайдир муаммо қийнаётганини сезиб қолди. Сабаби Чедвик жуда озғин ва ҳорғин кўринишга келиб қолганди. Шавқатсиз касаллик туфайли Чедвик Боузман 2020 йилнинг 28 август куни бу оламни тарк этди.
Изоҳ (0)