Андижонда 28 ёшли аёлнинг уйига бостириб кириб, уни калтаклаб пул талаб қилган 19 ёшли икки йигит қамоққа олинди. Бу ҳақда ИИВ Тергов департаменти хабар берди.
Маълум бўлишича, 24 август куни соат 22:30 ларда юз берган. Икки нафар номаълум шахс юзларига ниқоб тақиб, Асака тумани «Отиш» МФЙ Қўрғонолди кўчасида яшовчи 28 ёшли аёл И.Н.нинг уйига девор ошиш йўли билан ғайриқонуний равишда кириб, унинг қўли ва оғзини скотч билан боғлаб, юзи ва танасининг бошқа жойларига қўллари билан уриб, пул беришини талаб қилган. Аммо хонадон эгаси фаол қаршилик кўрсатганлиги сабабли ҳодиса жойидан яширинганлар.
Ҳолат юзасидан тергов-тезкор гуруҳи томонидан ҳодиса жойини кўздан кечириш жараёнида, қонга ўхшаш доғлар, бир дона чалабзар пичоқ ҳамда оёқ изи мавжуд бўлган тюнер аппарати, скотч бўлаклари ҳодиса содир бўлган жойидан 250 метр узоқликда йўл четида қўлбола усулда тикилган бир дона оқ-қора рангли ниқоб ва қонга ўхшаш доғлари бўлган бир жуфт оқ рангли резина қўлқоп борлиги аниқланиб, тегишли тартибда расмийлаштириб олинган.
Ҳолат юзасидан Асака тумани ИИБ ҳузуридаги Тергов бўлими томонидан Жиноят кодексининг 164-моддаси (босқинчилик) 3-қисми «в» банди билан жиноят иши қўзғатилган.
Жиноят иши бўйича олиб борилган тергов ҳаракатлари давомида мазкур жиноятни 19 ёшли Р.М. ва Т.А. содир этганлиги аниқланиб, Т.А.дан қўлбола усулда тикилган бир дона оқ рангли ниқоб ва бир дона оқ рангли резина қўлқоп расмийлаштириб олинган. Шунингдек, Р.М. ва Т.А. айбланувчи тариқасида жалб қилиниб, уларга нисбатан «қамоққа олиш» тарзидаги эҳтиёт чораси қўлланилган. Тергов ҳаракатлари давом этмоқда.
Изоҳ (0)