Кундалик турмушда кўриш қобилиятини ёмонлашишига сабаб бўладиган одатларнинг такрорланавериши оқибатида шифокор томонидан ёзилган дори воситалари ҳам таъсир қилмаслиги ва жиддий муаммолар кузатилиши мумкин. Тиббиёт фанлари номзоди, кўз шифокори Татьяна Фадейкина кўз саломатлигининг ёмонлашишига сабаб бўладиган одатларга нисбатан кўрилиши керак бўлган чораларга тўхталиб ўтади.
Экран қаршисида узоқ вақт ўтириш
Компьютер ёки телефонга узоқ вақт давомида тикилиш бугунги кунда кўриш қобилияти пасайишининг энг кўп учрайдиган сабабларидан бири саналади. Бир нуқтага қараб, экран нуридан чарчаган кўзнинг намланиши ёмонлашади ва бу кўз қуриши синдроми пайдо бўлишига олиб келади.
Мутахассисдан маслаҳат: Гаджетларни ишлатиш вақтини тартибга солиш керак. Агар иш фаолиятингиз билан боғлиқ бўлса, орада кўзларингизга дам бериш учун танаффус қилинг. Қолаверса, компьютердан тез-тез ва узоқ вақт фойдаланадиганлар кўз машқларини бажариб туриши керак бўлади.
Контакт линзаларидан нотўғри фойдаланиш
Линза тақиш кўзга инфекция кириши хавфини туғдиради. Линза бармоқ учига қўйилиб кейин кўзга тақилади, агар қўллар кир ёки ювилмаган бўлса кўзга кўринмайдиган бактериялар сабаб салбий оқибатлар билан тугаши мумкин. Шу боис линза тақишдан аввал фойдаланиш ва сақлаш бўйича қўлланма билан танишиб чиқиб унга риоя қилиш керак. Асосийси эса бир марта ишлатилган дезинфекцияловчи суюқликдан қайта фойдаланмаслик, чап кўзга тақилган линзани ўнгига ёки аксинча тақмаслик, муддатдан кўп тақиб юрмаслик ва тунда ечиш керак.
Мутахассисдан маслаҳат: Бактерия ва кир моддалар линзага жойлашиб яллиғланишга олиб келмаслиги учун душ қабул қилиш, ҳовузга тушиш, сауна ва денгизда чўмилишдан аввал линзаларни ечишни унутмаслик керак.
Сифатсиз қуёшдан ҳимояловчи кўзойнаклардан фойдаланиш
Қуёш нуридан ҳимояловчи кўзойнаклар кўз саломатлиги учун муҳим саналади. Ультрабинафша нурлари кўз пардасини зарарлаши ва катаракта пайдо бўлишига олиб келиши ҳам мумкин. Шу сабаб ҳам қуёшли ҳавода, машина ҳайдаганда ва соҳилда дам олишда кўзойнак тақишни унутмаслик керак.
Мутахассисдан маслаҳат: Қуёшдан ҳимояловчи кўзойнак танлашда унинг маркаси ёки моделига эмас, сифати ва ультрабинафша нурларини ўтказмайдиган фильтрларга эътибор қаратиш керак.
Гигиена қоидаларига риоя қилмаслик
Кўз саломатлиги учун гигиена қоидаларига амал қилиш, кир қўллар билан унга тегмаслик лозим. Бактериялар устдан ички қисмга кириши осон экани бунинг оқибати эса яллиғланиш билан тугаши мумкинлигини унутмаслик керак.
Мутахассисдан маслаҳат: Уйқуга ётишдан аввал аёллар макияж қолдиқларини ювиши зарур. Ювилмаган ёки чала қолган туш қолдиғи кўз ичига кириши ва яллиғланишга сабаб бўлиши мумкин. Бундан ташқари макияж воситаларининг таркиби, сифати ҳамда фойдаланиш муддатига эътибор бериш керак.
Изоҳ (0)