Ўзбекистонда хизмат кўрсатган маданият ходими, хонанда ва шифокор Авазбек Маҳмудов вафот этди. Бу ҳақда «Дарё»га Андижон давлат университети матбуот хизмати хабар берди.
Авазбек Маҳмудов 1952 йил Андижон вилоятининг Андижон шаҳрида туғилган. 1975 йил Андижон давлат тиббиёт институтини тугатган. Малакали шифокор сифатида узоқ йиллар институт клиникасида даволовчи шифокор, 2006 йилдан шу кунга қадар эса Андижон давлат университети мусиқа таълими кафедраси концертмейстри сифатида ишлаган.
1973 йилда Руминия, 1978 йилда Болгария, 1984 йилда Испанияда ўтказилган Халқаро фольклор фестиваллари ҳамда 1985 йилда Москвада ўтказилган XII бутун жаҳон фестивалида иштирок этиб, ғолиблар қаторидан жой олган. Авазбек Маҳмудов 1989 йилда Ўзбекистонда хизмат кўрсатган маданият ходими фахрий унвони билан тақдирланган.
Унинг «Оқ рўмолли қизлар», «Кўзингдан», «Ёр ёрига муносиб», «Шаҳримга кел», «Раъно кулиб», «Келмадингиз» каби қўшиқлари машҳур бўлган.
«Ўзтелерадиокомпания» олтин фондида Авазбек Маҳмудовнинг 30 га яқин қўшиқлари ҳамда ўзбек граммаёзувида 4 та пластинкалари мавжуд. Унинг 2014 йилда ўзи куйлаб, басталаган ва ноталаштирилган тўплами киритилган «Умрбоқий қўшиқлар» услубий қўлланмаси нашрдан чиққан.
Аввалроқ Қашқадарё соғлиқни сақлаш бошқармаси бошлиғи ўринбосари Шерали Нурматов, Ўзбекистонда хизмат кўрсатган ёшлар мураббийи ва ёзувчи Поён Равшанов, Ўзбекистонда хизмат кўрсатган артист, истеъфодаги полковник Икромжон Бўронов, Бухоро вилояти ҳокими вазифасини бажарувчи Карим Камолов вафот этгани ҳақида хабар берилган эди.
Изоҳ (0)