Осилган қовоқларни операциясиз қандай ўз ҳолига келтириш мумкин?

Юқори қовоқнинг осилиб қолиши кўпчилик аёлларнинг муаммоси ҳисобланади. Қовоқлар осилиб қолмаслиги учун нималарга эътибор қаратиш, бартараф қилиш учун нималарга амал қилиш керак? Қуйида ушбу саволга жавоб берамиз.

Юқори қовоқ нима учун осилиб қолади?

Инсон терисининг 70 фоизи таранглик ва эластиклик учун жавоб берадиган коллаген — оқсилдан ташкил топган бўлади. Помидор, карам, сабзи, кўкат ва балиқ маҳсулотлари эса коллаген шаклланишида аҳамиятли бўлган озуқа моддаларининг кони ҳисобланади. 25 ёшдан кейин коллаген ишлаб чиқарилиши сустлашади, 40 ёшдан кейин бўлса ушбу жараён тўхтайди. Тери таранглиги йўқолиб, бўшашиши эса юқори қовоқда ҳам ўз аксини кўрсатади.

Вазн ташлаш

Бирданига 10-15 килограмм вазн ташлаш натижасида ёғ тўқимаси жуда тез эрийди ва бу тери учун стресс ҳисобланади. Шу сабаб бирданига катта вазн ташламаслик, секин-аста озиш лозим. Масалан, ҳафтасига 200-300 грамм ташланг. Бунда саломатлигингизда муаммо кузатилмайди, тери эса ўзгаришларга осон адаптация қила бошлайди.

Қандай бартараф этиш мумкин?

Осилган қовоқдан тезда қутилишнинг жарроҳлик йўли ҳам бор ва бу блефаропластика деб аталади. Лекин муаммони тиғ билан ҳал қилишдан аввал табиий ва осон йўллардан фойдаланиш тавсия қилинади.

Юз фитнеси

Юз машқлари қовоқлар кўтарилиши, юз ранги тиниқлашиши ва майда ажинларнинг йўқолишига сабаб бўлади. Фейсфитнес халқаро академияси таъсисчиси Елена Каркукли 10 дақиқалик машқлар ҳар куни бажариб борилса, тез орада ижобий натижани пайқаш мумкинлигини таъкидлайди. Бунинг учун кафтларингизни пешонага қўйинг ва улари вертикал равишда маҳкамланг, қош ва пешонани кафт билан тепага тортинг. Нигоҳларингизни пастга қаратиб кўзингизни 15-20 марта очиб ёпинг. Кейинги машқни бажариш учун икки қўлингизни кўзингиз атрофига кўзойнак шаклига келтиринг, бунда қўллар кўз мушакларини сезиши керак. Кўз мушакларини ишлатинг ва видеодагидек давом эттиринг.

https://youtu.be/f8Z0twMlKZM

Уқалаш

Уқалаш машқларини ҳар куни бажариш, иложи бўлса, тонгда юзни ювгандан кейин амалга ошириш керак. Уқалаш мушакларнинг тикланишига, тери таранглашишига ёрдам беради. Бунинг учун қўлингизни кўзнинг ички бурчагидан ташқи томонга қараб ҳаракатлантиринг. Уқалаш машқини тунда макияж тозаланганидан кейин ҳам давом эттиринг. Мойчечак, маврак, ялпиз ўтларидан қўшиб тайёрланган муз бўлаклари ёрдамида уқалаш ҳам яхши самара беради.

Овқатланишга эътибор қаратинг

А, B витаминлари ҳамда фолий кислотасининг етишмаслиги организм, хусусан, тери ва соч аҳволи ёмонлашишига олиб келади. Терида шишлар бўлиши осилишининг олдини олиш, юз териси ранги соғлом кўриниши учун овқатланишингизга эътиборсиз бўлманг. Рационингизда оқсил, ёғ, углеводга бой маҳсулотлар бўлишига, балиқ, кўкатлар, брокколи, исмалоқ ва ёнғоқлар истеъмол қилишга ҳаракат қилинг.

Макияж

Юқори қовоқ билан боғлиқ муаммони макияж билан ҳам беркитиш мумкин:

• Юқори қовоқ ва кўзнинг ташқи бурчагига тўқ рангли тен суртинг;
• Қош остига ҳайлайтер суртинг;
• Қовоққа чиқиб турадиган қалин стрелка чизманг;
• Подводкани кўз чизиғи бўйлаб ингичка қилиб суртинг;
• Ялтирамайдиган тендан фойдаланинг, блескли ялтирайдиган тенлар қовоқнинг табиий шаклига урғу беради;
• Қошни бўяганда ташқи учини қовоққа тақаб узун ва паст қилиб чизманг.