Наманган шаҳридаги «Афсоналар водийси» тематик истироҳат боғи ҳудудида бир вақтнинг ўзида 15 минг кишини сиғдира олувчи масжид қурилмоқда.
Туркиялик тажрибали архитекторлар томонидан яратилган лойиҳа асосида қад ростлаётган масжид майдони 20 минг квадрат метрни ташкил этади. Масжид 3500 ўринга (атрофидаги очиқ намозгоҳларни қўшиб ҳисоблаганда 15 000 ўринга) мўлжалланган.
Унда каттагина кутубхона, анжуманлар зали ва узоқ жойдан келган меҳмонлар учун ҳам алоҳида шароитлар яратилиши назарда тутилган.
Бугунги кунга келиб масжид қурилиши ишлари 70 фоизга якунланган.
Маълумот учун, Вазирлар Маҳкамасининг «Наманган шаҳрида замонавий маданият ва истироҳат боғини ташкил этиш чора-тадбирлари тўғрисида» 2017 йил 16 сентябрдаги қарорига мувофиқ, Наманган шаҳрида собиқ «Машраб» боғи ўрнида «Афсоналар водийси» тематик истироҳат боғини қуриш ишлари амалга оширилмоқда.
2018 йилнинг 2-3 май кунлари ҳамда 2020 йилнинг 28 февраль–1 март кунлари Президент Шавкат Мирзиёев Наманган вилоятига ташрифи давомида ушбу маданият ва истироҳат боғи лойиҳаси билан танишиб, тегишли кўрсатмалар бериб, истироҳат боғига «Афсоналар водийси» дея ном берган. Давлат раҳбари 27 июнь куни Наманган шаҳрига ташрифи чоғида «Афсоналар водийси» маданият ва истироҳат боғи ҳудуди бўлиб, бу ерда бажарилган ишлар билан танишгани ва дам олувчилар билан мулоқот қилган.
Аввалроқ Самарқандда 7,5 минг намозхонга мўлжалланган вилоятдаги энг катта масжид қуриб битказилгани хабар берилган эди. 20 август куни эса Сурхондарё вилоят Адлия бошқармаси томонидан «Варроқ Термизий» масжиди рўйхатдан ўтказилди.
Изоҳ (0)