Ўзбекистон Республикаси бош вазири Абдулла Арипов 26 август куни Қирғизистон Республикаси бош вазири ўринбосари Акрам Мадумаровни қабул қилди. Бу ҳақда ЎзА хабар берган.
Хабарга кўра Вазирлар Маҳкамасида бўлиб ўтган учрашувда икки мамлакат президентларининг ташаббуслари ва саъй-ҳаракатлари билан сўнгги йилларда Ўзбекистон—Қирғизистон муносабатлари сифат жиҳатидан янги босқичга кўтарилгани қайд этилган.
Учрашувда давлат чегараларини делимитация қилиш, ўтказиш пунктлари самарали фаолиятини таъминлаш, савдо-иқтисодий, транспорт-коммуникация ва маданий-гуманитар ҳамкорликни ривожлантириш, сув ресурсларидан оқилона фойдаланиш масалалари муҳокама қилинган.
Шунингдек, икки давлат Ҳукуматлараро комиссия йиғилиши ҳамда чегараолди ҳудудлар раҳбарлари (ҳокимлари) кенгашининг навбатдаги мажлисларини ўтказиш масалалари кўриб чиқилган.
Шу кунларда Тошкент шаҳрида Ўзбекистон—Қирғизистон давлат чегарасини делимитация ва демаркация қилиш масалалари бўйича Ўзбекистон ва Қирғизистон ҳукуматлари делегацияларининг учрашуви ҳам бўлиб ўтмоқда, дейилади агентлик хабарида.
Мавзуга доир: Ўзбекистон—Қирғизистон чегарасида юз берган можаро юзасидан 6 нафар сўхлик қамоққа олинди
Изоҳ (0)