Шавкат Мирзиёев Ўзбекистонда ишлаб чиқариладиган Volkswagen, Skoda ва Isuzu махсус машиналарини кўздан кечирди

Президент Шавкат Мирзиёев 21 август, жума куни Бектемир туманига ташрифи давомида туман фаоллари билан учрашувдан сўнг Ўзбекистонда ишлаб чиқарилиши лойиҳалаштирилган махсус автомобилларни кўздан кечирди. Бу ҳақда Президент матбуот хизмати хабар берди.

Президент матбуот хизматининг таъкидлашича, Ўзбекистон Президентининг 2019 йил январда Германияга расмий ташрифи чоғида «Ўзавтосаноат» ва Volkswagen концерни ўртасида ҳамкорлик шартномаси имзоланган эди. Унга мувофиқ, Жиззах автомобиль заводида 3 хил модификациядаги Volkswagen Caddy минивэнини ишлаб чиқариш режалаштирилган. Етти ўринли бу автомобиль турли соҳаларга ихтисослаштириш учун жуда мос келади. Шунингдек, Isuzu заводида ҳам қулай платформа мавжуд.

Қайд этилишича, мамлакатда енгил автомобиллар, юк машинлари ва махсус техникалар ишлаб чиқарилиб, айнан шу йўналишдаги сегмент бўш эди. Қўшни давлатларда ҳам бундай автомобилларга эҳтиёж бор.

Шу мақсадда тажриба тариқасида Volkswagen, Skoda ва Isuzu йўналишида махсус машиналар намуналари тайёрланди.

Шавкат Мирзиёев бундай янги йўналиш импорт ўрнини тўлдириш ва экспортни кенгайтиришда муҳим эканини таъкидлаб, керакли кўрсатмалар берди.

Маълум қилинишича, ушбу машиналар 2020 йилнинг тўртинчи чорагида Жиззах автомобиль заводида йиғила бошлайди. 2022 йилдан ишлаб чиқаришнинг тўлиқ циклини ўзлаштириш режалаштирилган.

Эслатиб ўтамиз, Тошкентда 27 июль куни Volkswagen Caddy автомобиллари тақдимоти бўлиб ўтди. Автомобиль уч хил кўриниш ва комплектацияда сотувга чиқарилди. Шунингдек, Volkswagen Caddy негизида тез ёрдам машиналари тайёрланиб, Ўзбекистон шаҳарларига етказиб берилди.

Бундан ташқари, Ўзбекистонда Isuzu D-Max пикаплари негизида ҳам тез ёрдам машиналари ишлаб чиқарилмоқда.

Шавкат Мирзиёев 21 август куни Тошкент шаҳар Бектемир туманида бажарилаётган ишлар, саноат корхоналари фаолияти билан танишди. Давлат раҳбари металл конструкциялар заводига, «Бинокор» масъулияти чекланган жамиятнинг ишлаб чиқариш майдонига, пишлоқ ишлаб чиқарувчи қўшма корхонага, тўқимачилик дастгоҳлари учун эҳтиёт қисмлар ишлаб чиқарадиган корхонага, «Ўзавтосаноат» томонидан ташкил қилинган Cooperation LAB тармоқлараро кооперация марказига ташриф буюрди. Cooperation LAB марказида саноат соҳаларида маҳаллийлаштиришни кенгайтириш масаласида йиғилиш ўтказилди. Давлар раҳбари туман фаоллари билан учрашди.