Республика махсус комиссиясининг қарорига мувофиқ Россиянинг Ростов вилоятидан Ўзбекистон фуқароларини олиб келиш мақсадида темир йўл рейси ташкил этилмоқда. Бу ҳақда Транспорт вазирлиги хабар берди.
Маълум қилинишича, Россия ва Қозоғистон томонлари билан келишувга биноан Ўзбекистон фуқароларини йўловчи поездларида олиб келиш мақсадида Тошкент—Ростов-Дон—Тошкент йўналиши бўйича навбатдаги махсус темир йўл рейси ташкил этилмоқда.
Ушбу йўналиш бўйича темир йўл қатновини амалга оширувчи поезд 19 август куни Тошкентдан жўнаб кетди. Гниловская—Тошкент йўналишида ушбу поездда 918 нафар ўзбекистонлик 26 август куни Ўзбекистонга олиб келинади.
Мазкур йўловчи поезди йўл давомида фақат техник кўрик учун тўхтатилади, яъни бекат ва вокзалларда йўловчиларнинг платформага тушишига рухсат этилмайди.
Поезд Ўзбекистон Миллий гвардияси, Ички ишлар вазирлиги ва Соғлиқни сақлаш вазирлиги ходимлари кузатуви остида олиб келинади.
Ушбу рейсда олиб келинган йўловчилар Наманган вилоятининг карантин зоналарига юборилади. Вазирлик айнан шу жиҳатни инобатга олган ҳолда йўловчиларнинг қариндошлари ва яқинларидан уларни кутиб олиш мақсадида вокзалга ташриф буюрмасликни сўраган.
Эслатиб ўтамиз, 13 август куни Тошкент—Ростов-Дон—Тошкент йўналиши бўйича ташкил этилган темир йўл рейсида 918 нафар фуқаро Ўзбекистонга олиб келинганди.
Аввалроқ Россиядан поездда олиб келинган 918 нафар ўзбекистонлик Намангандаги карантин зонасига жойлаштирилганди. Шунингдек, яна бир поезд Самарадан Самарқандга ўзбекистонликларни олиб келган.
Изоҳ (0)