«Деҳқонобод калий заводи» 2018—2020 йилларда атроф-муҳитга келтирган зарари учун қўшимча 855 миллион 500 минг сўм компенсация тўлайдиган бўлди. Бу ҳақда Деҳқонобод туман экология инспекцияси бошлиғи Ўктам Жўллиев маълум қилган.
Таъкидланишича, Президент ҳузуридаги тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакилнинг 2020 йил 4 июндаги «Деҳқонобод калий заводи» АЖда текшириш ўтказиш тўғрисидаги қарори қабул қилинган. Шунга кўра, Экология ва атроф-муҳитни муҳофаза қилиш давлат қўмитаси раисининг 2020 йил 12 июнь куни «Деҳқонобод калий заводи» АЖда табиатни муҳофаза қилиш ва табиий ресурслардан оқилона фойдаланишга оид қонун ва қонуности ҳужжатлари талаблари ижроси таъминланиши юзасидан текширув ўтказиш ҳақида буйруғи чиқарилган.
Маълум қилинишича, текширув етти кун давом этган бўлиб, 2020 йилнинг 19—25 июнь кунлари ўтказилган.
Деҳқонобод туман экология ва атроф муҳитни муҳофаза қилиш соҳасидаги назорат бўйича инспекция бошлиғи Ўктам Жўллиевнинг маълумот беришича, завод 2018 йилда 10 миллион 107 минг сўм, 2019 йилда 6 миллион 962 минг сўм, 2020 йилнинг ўтган даври учун эса 2 миллион 698 минг сўм компенсация тўлаган.
«Эндиликда жамият шу тўловларга қўшимча яна 855 миллион 500 минг сўм компенсация тўлайди», — дейди Ўктам Жўллиев.
Эслатиб ўтамиз, 2010 йил август ойида фаолиятини бошлаган «Деҳқонобод калий заводи» ўтган ўн йиллик фаолияти давомида 30 дан ортиқ хорижий мамлакатга 300 миллион долларлик калий ўғитини экспорт қилгани ҳақида хабар берилганди.
Изоҳ (0)