Беларуснинг Словакиядаги элчиси Игорь Лешеня истеъфога чиқиш ҳақида ариза берганини маълум қилди. Дипломат ўз аризасини Беларусда президентлик сайловидан кейин бошланган тинч намойишлар иштирокчиларини қўллаб-қувватлаш ҳақида қилган видеомурожаатидан икки кун ўтиб берган, деб ёзмоқда Meduza.
«Бу мантиқий қадам, чунки элчи сифатида мен амалдаги президент томонидан тайинланганман ва у томонидан белгиланган сиёсатни амалга оширишим керак. Ташқи ишлар вазирлигининг билдиришича, менинг баёнотимда ифодаланган фуқаролик позицияси бу доирадан ташқарига чиққан», — деди Лешеня.
Лукашенко ҳозирча Словакиядаги элчининг истеъфоси ҳақидаги фармонни имзоламаган.
Игорь Лешеня 16 август куни видеомурожаат қилди ва унда намойишларда иштирок этаётган беларусликлар билан бирдамлигини маълум қилди.«Барча беларусликлар каби мен ҳам мамлакатим фуқароларининг қийноққа солиниши ва калтакланишидан шокдаман», — дея маълум қилган элчи. У Беларуснинг намойишларни қўллаб-қувватлаган амалдаги биринчи элчиси бўлди.
Эслатиб ўтамиз, Беларусда 9 август куни президент сайлови бўлиб ўтди. Сайлов куни Минск марказида ҳарбий техника пайдо бўлди. Беларусь милицияси сайлов участкалари олдида тўпланган одамларни қўлга олди. Сайлов куни оқшомида мамлакатнинг барча етакчи оммавий ахборот воситаларининг сайтлари очилмай қолди. Пойтахт Минскда президент сайловидан кейин норозилик намойиши бошланди. Шундан буён мамлакатда норозилик намойишлари ва намойишчиларни қўллаб-қувватлаш учун чиқишлар давом этмоқда.
Канада, Ирландия ва Буюк Британия Беларусдаги президентлик сайлови натижаларини тан олмади. АҚШ президенти Дональд Трамп Беларусда юз бераётган воқеаларга ўз муносабатини билдирди.
Аввалроқ Еврокомиссия иттифоқ мамлакатларни Минскка қарши санкциялар қўллашга тайёр деб баҳолаётгани ҳақида хабар берилганди. БМТ бош котиби эса Беларусда сайловлардан кейин юзага келган можарони мулоқот орқали ҳал қилишга чақирди. Европа парламенти Лукашенкога Persona non grata мақомини берди ва Москвадан Беларусь ишларига аралашмасликни сўради
Изоҳ (0)