Беларусь президентлиги сайловларида номзод сифатида қатнашган Светлана Тихановскаянинг штабига раҳбарлик қилган Мария Мороз фуқароларни Беларусдаги норозилик намойишларида иштирок этишга чорлади. Бу ҳақда Meduza хабар қилди.
Унинг сўзларига кўра, беларуслар эски тузум вакилларига ҳукумат тепасидан кетишдан бошқа чора йўқлигини тушунтиришда ёрдам бериши керак.
«Улар фақат куч ишлатиш ва муайян иқтисодий йўқотишларни яхши тушунади. Биз уларга буни бера олишимизни исботлашимиз лозим. Саройларда ва миллионларга тенг коттежларда яшайдиган амалдорларга пул керак. Уюштирилган митингларга автобусларда одамларни олиб келиш учун ҳам пул зарур. ОМОНга тўлов қилиш ҳам молиявий масала. Халқ энди ўз ёнидан ушбу харажатлар учун тўламоқчи эмаслигини уларга кўрсатиб қўйиши лозим», — деган Мороз.
Беларусда саноат корхоналаридаги ишчиларнинг кўпчилик қисми иш ташлаш эълон қилган. Хусусан, «Беларускалия» ходимлари, Беларусметаллургия заводи, БелАЗ ва Минск трактор заводи ишчилари ҳам норозилик билдиришни бошлаган. 16 август куни пойтахт Минскда мамлакат тарихидаги энг йирик митинг бўлиб ўтди — маълумотларга кўра, унда 200 минг киши қатнашган.
Мавзуга доир: Минскдаги завод ишчилари Лукашенкони «Кет!» дея кутиб олди. Лукашенко: «Кет деб бақираверинглар», деди ва кетди
Изоҳ (0)