«Сиз доимо менинг қалбимда қоласиз». Давид Сильва «Манчестер Сити» билан мактуб орқали хайрлашди

Ярим ҳимоячи Давид Сильва «Манчестер Сити»га таъсирли хайрлашув хатини ёзди.

Вақт келди. 10 йил ва 13 совриндан сўнг менинг ҳаётим ва фаолиятимда ўчмас из қолдирган клуб билан хайрлашиш вақти келди. Мен орқага ўгирилиб, 2010 йилда »Манчестер Сити»нинг лойиҳасига қўшилиш таклифига рози бўлишдан кўра яхшироқ қарор қабул қила олмаслигимни тушуниб етдим.

«Манчестер Сити» ва мен бирга улғайдик. Шу 10 йил ичида мен шахсий ва касбий томонлама ривожландим. Кўплаб ғалабаларни нишонладим ва ақл бовар қилмас лаҳзаларни кечирдим. Ўғлим Матеонинг қандай туғилганини кўрдим ва ҳатто Англиядаги ёмғирда ҳам ўзимни қулай ҳис қила бошладим. «Манчестер Сити» — ажойиб оила. Ҳаётимдаги энг оғир дамларни бошдан кечирганимда, улар менга ёрдам беришгани ва ҳамдардлик билдирганини ҳеч қачон унутмайман.

Шу сабабли айтмоқчиманки, мовий рангли либос кийиш, сардорлик боғичини тақиш, кийиниш хонасида дунёнинг энг яхши ўйинчилари ва мураббийлари билан бирга бўлиш ҳамда клуб ходимлари билан бирга ишлаш жуда ёқимли бўлди. Энг муҳими, бу вақт ичида яхши ва ёмон вазиятларда ҳам мени қўллаб-қувватлаган мухлисларга раҳмат. Сиз ҳақиқатан ҳам ажойибсиз.

Умид қиламанки, «Манчестер Сити» келажакда яна-да катта ютуқларга эришади. Мен жамоани масофадан туриб бўлса ҳам қўллаб-қувватлайман. Ушбу унутилмас дақиқаларни «Манчестер Сити» оиласи билан бўлишганимдан хурсандман. Сиз доимо менинг қалбимда қоласиз. Мен ҳар бир «шаҳарлик»ни қучоқлаб қоламан.

Сизнинг Давид Сильвангиз.

Давид Сильва, «Манчестер Сити» собиқ футболчиси

Маълумот учун, 34 ёшли футболчи 2010 йилдан буён «Манчестер Сити» сафида тўп тепиб келаётганди. Сильва бу давр ичида 436 та ўйинда иштирок этиб, 77 гол ва 140 та голли узатма муаллифига айланди. Давид «Сити» билан тўрт бор Премьер Лигада ғолиб чиқди. Шунингдек, беш марта Англия Лига Кубоги ва икки марта Англия Кубогига эга чиқди.