Ҳинд киноижодкорлари 1988 йилда Австралиянинг «Эдемга қайтиш» сериали ремейки бўлган «Қасос ўти»ни тақдим қилган. Замонасида етарлича машҳурликка эришган фильм қаҳрамонлар ҳаётида қандай ўзгаришлар юз берди? Lisa.ru шу ҳақида маълумот бериб ўтади.
Рекҳа — Арти Саксена (Жоти)
Асл сими Бханурекҳа Ганешан бўлган актриса, актёрлар оиласида дунёга келгани сабаб ҳам эрта суратга туша бошлаган. Бўлажак актриса 14 ёшида мактабни ташлаган ва стюардесса бўлиш орзусидан воз кечиб, кино оламига қадам қўйган. Иш ва тинимсиз суратга тушиш сабаб Рекҳа болалигидан эрта ажралган. Бироқ маҳорати ва тинимсиз меҳнати сабаб Болливуднинг энг таниқли актрисаларидан бирига айланган. «Қасос ўти»да рол ижро қилгунига қадар ўнга яқин фильмда суратга тушиб улгурган. Аммо айнан мазкур фильмдан кейин у дунё томошабинларининг эътирофига сазовор бўлган. Фильмда Рекҳа отаси ва эрининг ўлимидан кейин икки фарзанди билан ёлғиз қолган аёл ролини ижро қилган. Актриса бундан ташқари, «Бойлик ва камбағаллик», «Сен ёлғиз эмассан», «Оқ ва қора», «Кама Сутра: севги тарихи» ва яна бир қанча фильмларда суратга тушган. 65 ёш бўлишига қарамай, энг талабгир актрисалардан бири саналган Рекҳа бугунги кунда ҳам суратга тушишда давом этмоқда.
Шунга қарамасдан, унинг шахсий ҳаётида муваффақиятсизликлар лиммо-лим. 1970 йилларда актрисанинг оилали Амитабҳ Баччан билан бўлган муносабатлари кўплаб муҳокамаларга сабаб бўлган, бир неча йиллик учрашувлар актёрнинг ҳаммасига нуқта қўйиб, оиласига қайтмагунича давом этган. 1990 йилда Рекҳа бизнесмен Мукеш Агарвала билан турмуш қурган, аммо бу муносабатлар икки йилга ҳам бормаган. Турмуш ўртоғи у Америкада суратга олиш майдончасида эканида ўз жонига қасд қилган. Ушбу фожиадан кейин актриса қайта турмушга чиқишни истамаган. Бугунги кунда Рекҳа шаҳар ташқарисидаги уйида жияни билан бирга яшайди.
Кабир Беди — Санжай Варма
Кабир Беди сиёсатчилар оиласида дунёга келган. Кабир яхши таълимга эга бўлганидан кейин тарих бўйича фаолиятини давом эттиришни истаган, лекин реклама агентларидан суратга тушиш учун бўлган таклиф ҳаммасини ўзгартириб юборган. Ушбу суратга олинган ролик кинотеатрда фильмлар орасидаги танаффусда кўрсатилиши режиссёрлар эътиборидан четда қолмаган. Аввалига театрда суратга тушган, кейин бўлса кинога қадам қўйган. У нафақат Болливуд фильмларида суратга тушган, балки Европа ҳамда Америка киноижодкорлари билан ҳам ҳамкорлик қилишга муваффақ бўлган. «Қасос ўти» премьерасига қадар Американинг «Саккизоёқ», «Қотилликни у ёзган» ва «Тоғлик» фильмларида суратга тушиб улгурган. «Қасос ўти»да у бойликка эришиш мақсадида бева аёлни севгисига эришишга ҳаракат қилган салбий қаҳрамон ролини ижро қилган.
Актёр тўрт марта турмуш қурган. Биринчи ва иккинчи рафиқаси модель бўлган. Иккинчи турмушидан ўғилли бўлган ва фарзанди ҳам катта бўлиб отаси касбни афзал билган. Учинчи рафиқаси билан 13 йил яшаб ажрашганидан кейин 2016 йилда тўртинчи марта уйланган.
Сону Валия — Нандини
Модель сифатида фаолиятини бошлаган Сония 1985 йилда «Ҳиндистон гўзали» деб топилган. Шундан кейин унга фильмда суратга тушишга таклифлар келиб туша бошлаган ва у «Қасос ўти» фильмида эсда қоларли роллардан бирини гавдалантиришга муваффақ бўлган. Сония фильмда Санжайнинг мақсадига эришишга ёрдам бериш учун дугонасига хиёнат қиладиган Нандини ролини ижро қилган. Ушбу роли сабаб у «Иккинчи даражали энг яхши актриса» деб топилган. Унинг арсеналида «Хўрланган аёлнинг онаси», «Жаллод», «Ука» ва бошқа яна бир қанча фильмларни кўриш мумкин. Сўнгги вақтда актриса ижодида ижодий чекиниш кузатилмоқда. Валия бизнесмен Сурия Пракаш билан турмуш қурган, аммо фарзандининг отаси ҳаётдан кўз юмган.
Шатругхан Синха — Жей Ди
Карьерасини 1969 йилда бошлаган Шатругхан учун 80 йиллар омадли келган. Айниқса, «Қасос ўти»да жонлантирган суратчи Жей Ди роли унга муваффақият олиб келган. Фильмда у эрининг хиёнатидан кейин пластик операция қилдириб ўзини Жоти деб атай бошлаган бош қаҳрамон Артини севади.
Яна ўнлаб фильмларда суратга тушган Синха кейинчалик ижодни ташлаб сиёсат билан шуғуллана бошлайди. Актёр рафиқаси Пунам Чандрамани ва уч фарзанди билан бахтли ҳаёт кечириб келади. Синханинг кичик қизи ота касбни танлаган ва актриса сифатида яхши маълум.
Изоҳ (0)