Навоий вилояти ҳокими Қобул Турсунов ҳам коронавирусдан даволаниб, ўз ишига қайтди

Навоий вилояти ҳокими Қобул Турсунов Тошкент шаҳрида давом этган маълум муддат даволанишдан сўнг тўлиқ соғайиб, ўз фаолиятини давом эттиришга киришди. Бу ҳақда Навоий вилояти ҳокимлиги ахборот хизмати хабар берди.

Қобул Турсунов вилоят ҳокимлигининг масъул ходимлари — ҳоким ўринбосарлари, котибият мудирлари, гуруҳ раҳбарлари ҳамда бошқа мутасаддилар билан ўтказган дастлабки йиғилишида ҳудудларда олиб борилаётган ислоҳотларни давом эттириш ҳамда янги босқичга олиб чиқиш, аҳоли орасида коронавирус пандемияси билан боғлиқ ҳар қандай муаммоларни оқилона бартараф этиш йўллари борасида ўз таклиф ва тавсияларини билдирган.

«Пандемияни жиловлаш жараёнларида биринчи навбатда аҳоли саломатлигини муҳофаза қилиш, шунингдек, ҳар томонлама мураккаб шароитда иқтисодий-ижтимоий соҳаларнинг барча бўғинларида барқарор иш тизимини таъминлашда мавжуд куч ва имкониятларни тўлақонли сафарбар этиш давр талабидир», — деган йиғилишда Турсунов.

31 июль куни Навоий вилояти ҳокимлиги ахборот хизмати Қобул Турсуновнинг малакали тиббиёт мутахассислари томонидан ССВ тавсияларига мувофиқ ишлаб чиқилган стандартлар асосида коронавирусдан даволаш курсларини ўтаётганини хабар берган эди.

Аввалроқ Сурхондарё ҳокими Тўра Боболов коронавирусдан соғайиб, ўз ишига қайтгани тўғрисида хабар берилганди. Боболов коронавирусдан соғайган биринчи вилоят раҳбари бўлди. Ҳозирги кунда Бухоро вилояти ҳокими вазифасини бажарувчи Карим Камолов ҳам Тошкентда коронавирусдан даволанишда давом этмоқда.