Ўзбекистонда ОТМларга кириш имтиҳонларининг тест саволлари осонлаштирилади. Бу ҳақда Давлат тест маркази директори Мажид Каримов 12 август куни Халқаро пресс клубнинг қабул масалаларига бағишланган сессиясида маълум қилди.
«Тестлар 4 хил турда — содда саволлар, ўртача осон саволлар, мураккаброқ саволлар ва юқори мураккаблик даражасида белгиланар эди. Эндиликда содда саволлар 12 та, ўртача осон саволлар 12 та, 3-даражали мураккаброқ саволлар сони 6 та бўлди.
Юқори мураккаблик даражасидаги саволлар энди йўқ. Икки йилдан бери жуда мураккаб саволлар, яъни олимпиада иштирокчилари учун қўйиладиган саволлар бутунлай олиб ташланган», — деб изоҳлаган Мажид Каримов.
ДТМ директорининг билдиришича, республика бўйича бир кунда 100 минг одам тест синови топшириши режалаштирилмоқда.
Тошкент шаҳрида тест синовлари учун 10 000 тага яқин ўринли жой тайёрланган, синовлар икки сменада ташкил қилиниб, бир кунда 20 мингга яқин абитуриент тест топширишига имкон яратилади.
Тест топширилгандан кейин эртаси куни натижаларни кўрса бўлади. Бир ҳафта ичида абитуриент қайси йўналишга тавсия этилгани маълум қилинади. Бу маълумотлар ҳамда тўпланган балларни шахсий кабинет орқали билиб олиш мумкин.
Эслатиб ўтамиз, 2020 йилда Ўзбекистондаги олий таълим муассасаларига (ОТМ) бакалавриат босқичига 162 364 та, магистратурага 10 425 та ўрин ажратилган. Кириш имтиҳонлари икки сменада республика бўйича танлаб олинган 155 та стадионларнинг 40 тасида ўтказилади.
Ўзбекистонда пандемия шароити мураккаб кечаётганлиги, карантин чекловлари бекор қилинмаётганлиги ёки юмшатилмаганлиги боис олий таълим муассасаларининг бакалавриат таълим йўналишларига кириш тест синовларини ўтказиш муддатлари ҳақида жамоатчилик мунтазам хабардор қилиб борилади.
Изоҳ (0)