Беларусь пойтахти Минск шаҳри марказида 12 август куни тахминан 200 нафар оқ кийимдаги аёл гуллар тутган ҳолда жонли занжир ҳосил қилди. Бу ҳақда Meduza хабар берди.
Бу акция куч тузилмаларидан жабр кўрган намойишчиларга бирдамлик рамзи сифатида ўтказилди.
Беларусда уч кундан буён Александр Лукашенкога қарши намойишлар бўлиб ўтмоқда. Милиция кўздан ёш оқизувчи газ, сув замбараклари, ёруғлик ва товушли гранаталар ҳамда таёқлар қўллаган ҳолда намойишчиларни оммавий равишда қўлга олмоқда.
Эслатиб ўтамиз, Беларусда 9 август куни президент сайлови бўлиб ўтди. Сайлов куни Минск марказида ҳарбий техника пайдо бўлди. Беларусь милицияси сайлов участкалари олдида тўпланган одамларни қўлга олди. Сайлов куни оқшомида мамлакатнинг барча етакчи оммавий ахборот воситаларининг сайтлари очилмай қолди. Пойтахт Минскда президент сайловидан кейин норозилик намойиши бошланди.
Беларусь Марказий сайлов комиссиясининг дастлабки ҳисоб-китобларига кўра, президентлик сайловларида республиканинг амалдаги раҳбари Александр Лукашенко 80,23 фоиз овоз тўплаган. Мухолифат номзоди Светлана Тихановская эса расмий маълумотларга кўра, 9,9 фоиз овоз олган.
Изоҳ (0)