Forbes журнали энг кўп даромад олган актёрлар рейтингини эълон қилди. Унга кўра, мазкур рўйхатда 2019 йилдаги сингари америкалик актёр, продюссер ва рестлер Дуэйн Жонсон етакчилик қилмоқда.
Маълум қилинишича, актёрнинг 2020 йилда 87,5 миллион доллар деб баҳоланган даромади, 2019 йил билан солиштирилганда 1,9 миллионга кам. Унинг рейтингда етакчи бўлишига асосан «Қизил хабар» сериали учун қўлга киритган 23,5 миллион доллар гонорари ва Under Armour спорт либослари бренди билан тузган шартномаси сабаб бўлган.
Шунингдек, канадалик актёр Райан Рейнолдс рейтингда иккинчи ўринни олишга муваффақ бўлган. Унинг даромади 71,5 миллион долларни ташкил қилади. Америкалик актёр Марк Уолберг эса 58 миллион доллар билан учинчиликни эгаллаган.
Бундан ташқари, 55 миллион доллар билан Бен Аффлек тўртинчи, ундан 1 миллион кам даромад топган Вин Дизель эса бешинчи ўринга лойиқ топилган. Рейтингда Болливуд юлдузини ҳам учратиш мумкин, даромади 48,5 миллион доллар деб баҳоланган Акшай Кумар олтинчи, америкалик актёр Лин-Мануэль Миранда эса 45,5 миллион доллар билан еттинчи ўринни эгаллаган.
Қолаверса, 44,5 миллион доллар топган Уилл Смит саккизинчи деб топилган бўлса, 41 миллион доллар даромадга эга бўлган Адам Сэндлер тўққизинчи бўлган. 40 миллион доллар ҳақ тўланган Жеки Чан рўйхат ўнталигига якун ясаган.
Изоҳ (0)