Беларусь президентлигига номзод Светлана Тихановская видеомурожаат орқали ўз тарафдорларини мамлакат шаҳарларида норозилик намойишларини тўхтатишга чақирди. Бу ҳақда Meduza хабар берди.
Видео Telegram’даги Беларусь ҳукумати тарафдори бўлган «Жёлтие сливи» канали томонидан эълон қилинган. Видеомурожаат қачон ва қаерда ёзилгани номаълум. Тихановская мурожаат матнини камерага қарамасдан, қоғоз варағидан ўқиб берган.
«Мен, Светлана Тихановская, сизларга давлат раҳбари сайловидаги иштирокингиз учун миннатдорчилик билдираман. Беларусь халқи ўз танловини қилди. Бу вақт давомида мени қўллаб-қувватлаган барча фуқароларга миннатдорлик ва илиқлик билан мурожаат қиламан. Беларусликлар! Сизни ақл билан иш кўришга ва қонунни ҳурмат қилишга чақираман. Мен қон ва зўравонликни хоҳламайман. Ўз ҳаётингизни хавф остида қолдирмаслик учун сизлардан милицияга қаршилик кўрсатмасликни, майдонларга чиқмасликни сўрайман. Ўзингизни ва яқинларингизни асранг», — дея мурожаат қилган Тихановская.
11 август куни Тихановская Беларусдан чиқиб кетгани ва Литвада эканлиги маълум бўлди. Унинг штаби томонидан маълум қилинишича, президентликка номзод бу ишни ўз хоҳиши билан қилмаган, балки штаб раҳбари Мария Морознинг озод этилиши эвазига ҳукумат босими остида амалга оширган.
Тахминан ўша вақтда Тихановскаянинг бошқа бир видеомурожаати эълон қилинган. Унда Тихановская ўзининг кетиши «оғир қарор» бўлганини маълум қилган. «Бутун бошли кампания мени обдан тоблаб, мен дош бера оладиган жуда катта куч берди, деб ўйлагандим, лекин, менимча, аввалгидай заиф аёллигимча қолдим», — деди Тихановская.
Мавзуга доир: «Мен дуч келган бундай танловда қолишни Худо кўрсатмасин». Беларусни тарк этган Тихановская халққа мурожаат қилди
Эслатиб ўтамиз, Беларусда 9 август куни президент сайлови бўлиб ўтди. Пойтахт Минскда президент сайловидан кейин норозилик намойиши бошланган. Беларусь Марказий сайлов комиссиясининг дастлабки ҳисоб-китобларига кўра, президентлик сайловларида республиканинг амалдаги раҳбари Александр Лукашенко 80,23 фоиз овоз тўплаган. Мухолифат номзоди Светлана Тихановская эса расмий маълумотларга кўра, 9,9 фоиз овоз олган.
Кейинроқ Светлана Тихановская ўтказилган сайловларда ўзини ғолиб дея ҳисоблашини маълум қилди ва Лукашенкога музокаралар ўтказиш таклифини берди. Шунингдек, у сайловларнинг натижаси юзасидан Марказий сайлов комиссиясига норозилик билдирди.
Светлана Тихановскаянинг штаби 10 август куни кечаси у Беларусь Марказий сайлов комиссиясига борганидан сўнг йўқолиб қолганини билдирган. Кечга яқин Тихановская алоқага чиққан, бироқ қаерда эканлигини ошкор этмаган. Беларусь Давлат хавфсизлик қўмитаси Светлана Тихановскаяга уюштирилган суиқасднинг олди олинганини маълум қилган.
Изоҳ (0)