Коронавирус вакциналаридан бирини ишлаб чиқувчилардан бўлган туркиялик шифокорлар одамларда клиник синовларни ўтказиш учун рухсат олди. Бу ҳақда 9 август куни Туркия президенти Ражаб Тоййиб Эрдўғон маълум қилди.
«Туркия АҚШ ва Хитой билан бир қаторда, коронавирусга қарши ўз вакцинасини ишлаб чиқаётган уч мамлакатдан биридир. Бизнинг иккита вакцинамиз ҳайвонларда муваффақиятли синовдан ўтказилди, улардан бири одамларда клиник тадқиқотлар ўтказиш рухсатига эга бўлди», — дея унинг сўзларини келтирмоқда Аnadolu агентлиги.
29 июль куни Туркия соғлиқни сақлаш вазири Фаҳриддин Хўжа Туркия коронавирусга қарши вакцина яратиш масаласида Россия ва Хитой билан алоқада эканлигини маълум қилганди.
Айни пайтда дунё бўйлаб бир неча вакциналар ҳозирда якуний синов жараёнида. Хусусан, АҚШда Moderna компанияси ишлаб чиқарган вакцина 30 минг кишида якуний синовдан ўтказилмоқда. Қозоғистонда эса 1 август куни COVID-19’га қарши биринчи эмлаш ўтказилган. Россияда COVID-19’га қарши вакцинанинг клиник синовлари якунланган, оммавий эмлаш октябрь ойида бошланиши режалаштирилмоқда. Мамлакатда 2021 йилдан бошлаб ҳар ойда коронавирусга қарши миллионлаб доза вакцина ишлаб чиқарилиши маълум қилинган.
Аввалроқ ЖССТнинг соғлиқни сақлаш соҳасида фавқулодда вазиятлар бўйича дастури директори Майкл Райан тадқиқотчилар коронавирусга қарши вакциналар яратишда салмоқли натижаларга эришгани, бироқ улар 2021 йилдан эртароқ қўлланилмаслигини айтганди, ташкилот раҳбари Тедрос Гебрейесус эса коронавирусга қарши яратилаётган амалда вакциналар омадсизлик билан якун топиши мумкинлигини билдирган.
Изоҳ (0)