Чиро Иммобиле — 2019/20 йилги мавсумнинг тўпурари. Италиялик футболчи 30 ёшида «ерлик бўлмаган» Криштиану Роналду ва Лионель Мессига қараганда кўпроқ гол уриб, «Олтин бутса»ни қўлга киритди ҳамда кўпчиликнинг ҳайрат ва олқишига сазовор бўлди. Ҳужумчи Германия, Италия ва Испаниядаги дарбадарликдан сўнг «Лацио»да том маънода порлашга муваффақ бўлди. Қуйида у қандай қилиб бундай муваффақиятга эришгани ҳақида фикр юритилади.
Германия ва Испанияда омадсизликка учраган Иммобиле ўз ватанида қадр топди
«Торино»даги 2013/2014 йилги муваффақиятли мавсумда Иммобиле А Сериянинг энг яхши тўпурарига айланади ва «Боруссия Дортмунд» сафига бориб қўшилади. Немис клуби раҳбарияти Иммобилени Роберт Левандовскининг ўрнини тўлдириш учун харид қилганди. Афсуски, дастлабки ўйинлардан бошлаб Бундеслигада Чиронинг ишлари юришмайди. Фақат бешинчи ўйинга келибгина у ўзининг дебют голини уради. Клуб ва мухлислар ҳужумчидан кўп нарсани кутаётганди. Чиро эса Дортмундда кам гол урарди. Ўшанда уни бирон нарсада айблаш мушкул эди: клубга ёрдам беришга бўлган тиришқоқлиги ва голга бўлган чанқоғи ҳар бир ўйинда кўриниб турарди, бироқ шунчаки омад ундан юз ўгирарди. «Боруссия»нинг ўйин услуби Чирога мос келмасди.
Мавсумнинг иккинчи қисми эса Чиро учун худди даҳшатли туш каби ўтди: у бор-йўғи бир нечта ўйинларда захирадан ўйинга қўшилди.
Иммобиленинг ўзи эса Дортмундда уни қўллаб-қувватлаш бўлмаганини таъкидлайди: «Оилам ва мен ҳеч қандай ёрдам олмадик ва жуда кўп қийналдик. Немис тилини билмайман, бу тилни ўрганиш жуда қийин экан».
Бироқ бу ерда ортиқча чуқурлашишнинг ҳожати йўқ. Барчаси оддий: Чиро клубга, клуб эса Чирога мос келмади. Клопп (Юрген Клопп у пайтда «Боруссия Д»да ишлаган — «Дарё») ўйинни Обамеянг атрофида қуришни афзал кўрди, Чиро эса кўп ҳам майдонда пайдо бўлавермади. Кейинги мавсумда эса клуб ун ижарага бериб юборишга қарор қилди.
Шу тариқа Иммобиле «Севилья»га бориб қолди. Испания Чирога кўпроқ ёқарди, ҳатто у буни бир неча бор матбуотда ҳам тан олган. Аммо агар майдонда бунинг акси бўлса, бундан нима наф, шундай эмасми? Олти ой давомида Чиро атиги 15 та ўйин ўтказиб, 4 бор рақиблар дарвозасини ишғол қилди.
Чиро «Севилья»даги фаолиятини шундай ёдга олади: «Ўзимни ноқулай ҳис қилардим, менга жуда кам имконият бериларди. Кетмоқчи бўлдим, бироқ Унай Эмери жамоада қолишимни сўради. Майдонга чиқдим, иккита гол урдим, аммо кейин у мени яна захирага ўтқазиб қўйди. Шунда Эмерининг футбол ҳақида ҳеч нарсани билмаслигини тушунгандим».
Мавзуга доир: Чиро Иммобиле: Испанияда бўлган вақтимда Унаи Эмери ҳеч вақони тушунмаслигини англаб етгандим
Мураббий ва футболчининг ажойиб тандеми
Марсело Бьелса «Лацио»ни можароли тарзда тарк этганидан сўнг клуб бошқарувига Симоне Инзаги келади. Мураббий ва Чиро тезда тил топишиб кетди. Индзаги Иммобилега ишонч билдиради, ўз навбатида Чиро ҳам мураббий томонидан билдирилган ишончни оқлашга ҳаракат қилди ва айтиш мумкинки, буни қойилмақом қилиб бажарди.
«Мен ҳар қандай ҳолатда ҳам ‘Лацио’да ўйнашга рози эдим. Бу ерда ўзимни яхши ҳис қилдим, жамоа ва мураббий менга маъқул келди. Мен бу ерда Дортмундда қилган хатомни қилмадим. У ерда мен жавобгарликни ҳис этиб турардим, Римда эса бу ҳақда ўйламасликка қарор қилдим», — деганди Иммобиле «Лацио»га келгани ҳақида.
Иммобилени тезкор ҳужумчилар қаторига қўшиш бироз мушкул, техник имкониятлари билан мақтана олмайди. Инзаги эса жамоавий ўйин услубини қуришда Иммобиленинг айнан ушбу жиҳатларидан фойдаланди. Қолган ўйинчилар Чирога мослаштирилди. Чиро ўйиннинг боришини яхши ҳис қилади ва қайси зонада тўпни қабул қилиш кераклигини билади. Шу билан бирга Инзаги уни «қора ишлар»дан ҳам озод қилди: Чиронинг ўйинини диққат билан кузатилса, унинг деярли ортга қайтмаслигини кўриш мумкин.
Иммобиле Инзагининг Клоппга ўхшайдими деган саволга қуйидагича жавоб берган: «Футболчиларга мотивация бериш нуқтаи назаридан, ҳа. Инзаги — ҳақиқий Европача мураббий. Менга у билан ишлаш ёқади».
Иммобиле ўзининг «Лацио»даги дебют мавсумида 23 та гол уради. Бундан ташқари, у илк марта бир жамоада иккинчи мавсумга қолаётганди. У бунгача ҳеч қачон бир клубда иккинчи йилга қолмаганди.
Кўҳна қитъанинг энг яхши тўпурари
Якунига етган мавсумни Иммобиле ўзгача бир кўтаринки кайфиятда бошлади. А Сериянинг илк турларидан бошлаб тўпурарлар рўйхатида биринчиликни ҳеч кимга бермади. Аммо жуда озчилик якунда унинг «Олтин бутса»ни қўлга киритишини тахмин қилганди. Танқидчилар эса фақатгина январь ойига келиб, Чиро голлари бўйича Левандовскига етиб олганида тилини тишлаб қолди. Чиро шундан сўнг ҳам тўхташни хоҳламади ва карантинга етакчи сифатида йўл олди. Карантиндан биринчи бўлиб, Германия чиқди. Левандовски эса деярли ҳар бир ўйинда гол уришни канда қилмасди. Май ойининг охирига келиб, кўпчилик полшалик ҳужумчининг «Олтин бутса» пойгасидаги ғалабаси муқаррар эканини таъкидлади. Роберт 34 та голли «планка»ни қўйиб, таътилга чиқиб кетди. Италияда эса кураш энди авжига чиққанди.
- Фото: Twitter
- Иммобиле италиялик футболчилар орасида А Сериянинг бир мавсумида энг кўп гол уриш бўйича рекорд ўрнатди. 36 та гол билан у «Интер» собиқ ҳужумчиси Антонио Анжелиллонинг (1958/1959 йилги мавсумда 33 та гол) рекордини янгилади.
- Чиро бир мавсум давомида 36 та гол уриб, А Серия рекордини такрорлади. Ушбу рекордни «Ювентус» ҳужумчиси Гонсало Игуаин 2015/2016 йилги мавсумда қайд этганди.
- Иммобиле Италия чемпионатининг бир мавсум давомида пенальтиларни аниқ амалга ошириш борасида рекордни янгилади. Чиро якунига етган мавсумда 14 бор 11 метрлик зарбани аниқ амалга оширди. Бундан олдинги натижа 12 тага тенг эди.
- Иммобиле А Сериянинг бир мавсумида 30 ва ундан кўпроқ гол урган италиялик бешинчи футболчига айланди. Ундан олдин бундай натижани 1929/1930 йилги мавсумда Жузеппе Меацца (31 та гол), Феличе Борель (1933/1934 йилги мавсум, 31 та гол), Антонио Анжелило (1958/1959, 33) ва Лука Тони (2005/2006, 31) қайд этган.
- Иммобиле 13 йиллик танаффусдан кейин илк марта «Олтин бутса»ни Италияга қайтарди. А Серияда охирги марта 2007 йилда Франческо Тотти мазкур совринни қўлга киритганди.
Жуда хурсандман. Мен эришган нарсаларимдан фахрланаман, айниқса орқага қараб, қаердан бошлаганимни ва нималарни бошдан кечирганимни ўйласам. Агар нимагадир астойдил ишонсангиз, баъзида орзулар рўёбга чиқади.Офарин Чиро!Мураббийга, клуб ходимларига ва жамоадошларимга раҳмат айтмоқчиман. Ушбу рекорд бутун жамоанинг ютуғидир. Жамоа мухлисларига раҳмат. Мен бундан жуда ғурурланаман.
Агар таслим бўлмаса, ҳар қандай мақсадга эришиш мумкинлигига мисол бўлишни истайман. Мен ушбу спорт тарихида ўз ўрнимни эгаллаганимдан жуда ғурурланаман.
«Верона»га қарши ўйиндаги ҳет-трикдан кейин кийиниш хонасида жамоадошларим мени қандай кутиб олишганини эслаб, ўзгача туйғуларни ҳис қиляпман. Спортнинг моҳияти ҳам шунда деб ўйлайман.
Чиро Иммобиле
Билол ЭРКИН таржимаси
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)