Самарқанд вилоятининг Иштихон туманида SMS туфайли келиб чиққан жанжал одам ўлими билан якунланди. Бу ҳақда Тергов департаменти хабар бермоқда.
Ҳодиса 4 август куни соат 14:00 ларда «Халқобод» МФЙда юз берган. 34 ёшли Ш.Й. ҳамқишлоғи 27 ёшли Н.Б. исмли йигитга телефон қилиб чақиради. У йигитдан нима мақсадда синглиси 18 ёшли М.Д.га SMS хабар жўнатиб, тинчлигини бузаётганлигини сўрайди. Улар ўзаро жанжаллашиб қолади ва жанжал давомида Ш.Й. мушти билан Н.Б.ни бош соҳасига уриб тан жароҳати етказган.
Оқибатда Н.Б. тан жароҳати билан туман тиббиёт бирлашмасининг жонлантириш бўлимига ётқизилган. Шифокорлар томонидан кўрсатилган тиббий муолажаларга қарамасдан шифохонада вафот этган.
Мазкур ҳолат юзасидан Иштихон туман ИИБ ҳузуридаги Тергов бўлими томонидан Жиноят кодексининг 104-моддаси 3-қисми «д» банди (жабрланувчининг ўлимига олиб келган қасддан баданга оғир шикаст етказиш) билан жиноят иши қўзғатилган. Ушбу модда бўйича айбдор деб топилган шахс 8 йилдан 10 йилгача озодликдан маҳрум этилиши мумкин. Ҳозирда тергов ҳаракатлари олиб борилмоқда.
Эслатиб ўтамиз, 25 июль куни Андижонда 18 ёшли йигит севган қизига гап отган 30 ёшли эркакни темир бўлаги билан уриб ўлдириб қўйгани ҳақида хабар берилганди.
Изоҳ (0)