Трамп АҚШ фуқароларига TikTok ва WeChat компаниялари билан алоқа қилишни тақиқлади

АҚШ президенти Дональд Трамп мамлакат фуқароларига TikTok қисқа видео-сервисига ва WeChat мессенжерига эгалик қилувчи Хитойнинг ByteDance ва Tencent компаниялари билан битимлар тузишни тақиқловчи иккита фармонни имзолади. Фармонлар 20 сентябрда кучга киради. Бу ҳақда «Meduza» хабар берди.

Ўзининг фармонлари билан Трамп Америка юрисдикциясига алоқадор ҳар қандай одамнинг ушбу компаниялар ва уларнинг филиаллари билан битимлар тузишни тақиқлади. Шу билан бирга, Оқ уй вакили Los-Angeles Times’га айтишича, WeChat’га тегишли қарор фақат Tencent’нинг бошқа тузилмаларига эмас, балки мессенжер билан боғлиқ битимларга нисбатан қўлланилади.

Трамп, TikTok ва WeChat АҚШнинг хавфсизлиги, ташқи сиёсати ва иқтисодиётига таҳдид солади, деб ҳисоблайди. Фармонларга кўра, иловалар жосуслик қилишлари ва фойдаланувчи маълумотларини Хитой ҳукуматига етказиши мумкин.

ByteDance вакилининг сўзларига кўра, TikTok Хитой ҳукумати билан маълумот алмашмайди. Хитой Ташқи ишлар вазирлиги, ўз навбатида, АҚШ президенти маъмуриятининг ҳаракати бозор тамойиллари ва халқаро савдо қоидаларига зид эканлигини айтди.

Шунингдек, Microsoft компанияси АҚШ, Канада, Австралия ва Янги Зеландияда хизмат кўрсатиш бизнесини ривожлантириш ниятида бўлган TikTok’га қизиқиш билдирмоқда.

Bloomberg нашрининг таъкидлашича, Microsoft TikTok’ни тўлиқ сотиб олиш учун ByteDance билан музокаралар олиб бораётган эди, лекин Трампнинг мамлакатда бу тармоқни тақиқлаш ниятида эканидан сўнг музокаралар вақтинча тўхтатилди. Аввалроқ, Дональд Трамп, шунингдек, бутун TikTok бизнесини сотиб олиш бўйича таклиф билан чиқди. ByteDance бу ҳақида изоҳ беришдан бош тортди ва компания TikTok’нинг узоқ муддатли муваффақиятига ишонишини айтди.