Таниқли француз актёри Луи де Фюнес 50 ёшга кирганида томошабинлар эътиборига тушган. У «Агар ҳаммаси ортга қайтганида яна худди шундай яшашни истар эдим» дея таъкидлаган. Буюк истеъдод соҳибининг ҳаёт йўлига назар ташлаймиз.
Ота-онаси томонидан Фюфю деб ном берилган актёр дунёга келганига уч кун бўлганида Биринчи жаҳон уруши бошланди. Отаси олмос кесувчи, онаси уй бекаси бўлса-да, унинг истакларини қўллаб-қувватлаган.
Луининг ўқиши яхши бўлмаган, шунинг учун ҳам ота-онаси мунтазам равишда мактабга чақиртирилган. У коллежни ҳам тамомлашни истамай, Курбевуа шаҳридан Парижга кўчиб кетади. Ёшлигиданоқ ўнлаб касбларни ўзида синаб кўрган актёр сутчи, почтачи, ром таъмирловчи ва пойабзал устаси бўлишга ҳам улгурган.
Луи ёшлигидан мусиқага меҳр қўйганди. Бу борада иш фаолиятини кафе-барларда пианино чалишдан бошлайди. Унинг мухлислари нафақат мусиқа тинглашга, балки қизиқарли имо-ишораларини томоша қилиш учун ҳам келарди.
Иккинчи жаҳон уруши даврида ҳарбийга чақирилган Луи орадан бор ой ўтиб, ортга қайтариб юборилган. Нимжонлиги ва доимий йўтали туфайли шифокорлар унга сил касаллиги ташхисини қўяди. Аслида эса у кўп чекарди. Йўталдан азият чеккан актёрнинг бўйи 164 сантиметр, вазни эса 50 килограммдан бироз ошарди.
Актёрлик фаолиятини 1945 йилда бошлаган Луи 10 йил давомида фақатгина иккинчи даражали ҳамда эпизодик ролларни ижро этган. Луининг айтишича, бу актёрлик маҳоратини бойитишда босиб ўтилиши керак бўлган йўл эди.
Паст бўйли ва кўримсиз Луи барча француз эркаклари каби гўзал аёлларга ошиқ бўлган. Шунга қарамай, у умри давомида икки марта оила қурди. Дастлаб 22 ёшида уйланган актёр аёли билан 6 йил давомида бирга яшади. Сўнгра 1943 йилда машҳур ёзувчи Ги де Мопассаннинг жияни Жанна Августинага уйланади ва у билан умрининг охиригача бирга яшади.
Актёрнинг 130 дан ортиқ комик роллари мавжуд. Унга «Фантомас» ва жандармларнинг саргузашти ҳақидаги бир неча фильм машҳурлик олиб келди. Луи ҳар бир фильмнинг премьераси куни кинотеатрларга ташриф буюрарди, чиптачи ва навбатда турган одамларнинг суҳбатини тинглашни, чипталар яхши сотилаётганини билишни хоҳларди.
Комик актёр ҳаётда ҳам қувноқ ва хушмуомала инсон эди. Лекин ғазабланган пайтида уни ҳеч ким танимай қолган. Аслида бундай воқеа умри давомида икки маротаба рўй берган. Биринчиси, театр режиссёри унинг хотини ҳақида нотўғри фикр билдиргани учун тузилган шартномани бекор қилган. Иккинчисида, ўғли каскадёрсиз трюк бажаргани учун киностудияда яхшигина жанжал кўтарган.
Луининг учта ўғли бор, биринчи турмушидан Даниэль исмли фарзанди бўлиб, афсуски, улар унчалик яқин бўлмаган. Патрик ва Оливье эса ота меҳрига тўйиб улғайди. Патрик шифокор, Оливье эса дастлаб актёрлик соҳасида фаолият юритди. Ҳатто, отаси билан биргаликда 6 та фильмда роль ижро этди. Сўнгра учувчи бўлишни истаган Оливье актёрлик фаолиятига нуқта қўйди.
Актёр 1983 йил 27 январда 68 ёшида юрак хуружидан вафот этди. Унинг аёли Луининг ўлимидан сўнг яна 32 йил яшади. Жанна фарзандлар ва набиралари ардоғида 101 йил умр кўрди.
Изоҳ (0)