Сирдарё вилояти Оқолтин туманидаги кўп қаватли уй-жойларнинг қурилиш-таъмирлаш ишларида бюджет маблағларини талон-тарож қилган МЧЖ мансабдорларига нисбатан жиноят иши очилди. Бу ҳақда Бош прокуратура «Дарё»га хабар берди.
Маълумотларга кўра, «Қишлоқ қурилиш инвест» МЧЖ ИК Сирдарё вилояти филиали ва «С.С.» МЧЖ мансабдор шахслари ўзаро тил бириктириб, Оқолтин тумани «Кўркам диёр» мавзесида 1 та кўп қаватли уй-жойнинг қурилганлиги ҳақидаги ҳужжатларга ҳақиқатда бажарилмаган 949 миллион сўмлик қурилиш-таъмирлаш ишларини қўшиб ёзиш орқали бюджет маблағлари талон-торож қилган. Бу Бош прокуратура ҳузуридаги департаментнинг Оқолтин туман бўлими томонидан ўтказилган терговга қадар текширувлар давомида аниқланган.
Шунингдек, «Е.Н» МЧЖ томонидан ҳам мавзесидаги 1 та кўп қаватли уй-жойнинг қурилганлиги ҳақидаги ҳужжатларга 586 миллион сўмни қўшиб ёзгани аниқланган.
Мазкур ҳолатлар юзасидан «Қишлоқ қурилиш инвест» МЧЖ ИК Сирдарё вилояти филиали мансабдор шахслари ва жамият раҳбарларига нисбатан Жиноят кодексининг 167-моддаси 3-қисми «а» банди (Ўзлаштириш ёки растрата йўли билан талон-торож қилиш) билан жиноят иши қўзғатилиб, тергов ҳаракатлари ўтказилмоқда.
Аввалроқ Тошкент шаҳрида муҳтож оилалар учун йиғилган маблағларнинг 95 миллион сўмдан ортиғи, Андижонда эса Шаҳрихонда кам таъминланган оилаларга ажратилган 82 миллион сўм мансабдорлар томонидан талон-торож қилингани аниқланганди.
Изоҳ (0)