Навоий вилояти ҳокими коронавирусга чалинган. Аввалроқ Қорақалпоғистон, Сурхондарё ва Бухоро раҳбарларида ҳам COVID-19 аниқланган эди

Тошкент шаҳрида даволанаётгани маълум қилинган Навоий вилояти ҳокими Қобул Турсунов коронавирусга чалинган. Бу ҳақда «Дарё»га Навоий вилояти ҳокимлиги ахборот хизмати раҳбари Дилшод Мамаражабов маълум қилди.

Навоий вилояти ҳокимлиги 31 июль куни вилоят раҳбари Қобул Турсунов сўнгги тўрт кундан бери Тошкентда даволанишда экани ҳақида хабар берган, бироқ унинг айнан қайси касалликдан даволанаётганига аниқлик киритмаган эди.

Навоий вилояти ҳокимлиги ахборот хизмати вакили «Дарё» мухбири билан суҳбатда вилоят раҳбари коронавирус инфекциясидан даволанаётганини тасдиқлади. Қайд этиш жоиз, Навоий вилояти ҳокимлиги ахборот хизмати вилоят ҳокими даражасидаги раҳбарнинг коронавирусга чалингани ҳақидаги ахборотни яширмай, ошкор қилган ягона расмий манба бўлиб турибди.

Бунгача Қорақалпоғистон Жўқорғи Кенгеси раиси Муса Ерниязов, Сурхондарё вилояти ҳокими Тўра Боболов, Бухоро вилояти ҳокими вазифасини бажарувчи Карим Камолов коронавирусга чалингани тасдиқланган эди. Сўнгги маълумотларга кўра, Муса Ерниязовнинг аҳволи оғир деб баҳоланмоқда, у сунъий нафас олиш аппаратига уланган.

Шунингдек, Ўзбекистон бош вазири ўринбосари Ўктам Барноев, давлат бош санитария инспектори Нурмат Отабековда ҳам коронавирус инфекциясидан даволанаётгани ҳақида хабар берилган эди. 29 июль куни Ўзбекистон молия вазири ўринбосари Ёрқин Турсунов коронавирус инфекцияси асоратлари оқибатида вафот этгани маълум бўлган эди.

Маълумот учун, Ўзбекистонда 31 июль соат 10:00 ҳолатига кўра жами 23 558 кишида коронавирус аниқланган. Шундан 13 680 нафари соғайган, ССВ маълумотларига кўра, 137 киши касаллик асоратлари оқибатида вафот этган («Дарё» ҳисоби бўйича коронавирус оқибатида вафот этганлар сони 143 нафарни ташкил этмоқда). Айни вақтда 9741 нафар бемор даволанаётган бўлиб, улардан 617 нафарининг аҳволи оғир, шундан 181 нафарининг аҳволи ўта оғир деб баҳоланмоқда.