Хонанда Муниса Ризаева Instagram’даги саҳифасида жонли эфир орқали мухлислар билан мулоқот қилиб, коронавирусга чалиниб, касалхонада эканлигини, уч ҳафта даволанганидан сўнг аҳволи яхшиланаётганини билдирди.
«Уч марта коронавирусга тест топширдим, чиқмади. Иссиғим чиқиб, мазам бўлмади. Икки ҳафтадан кейин яна топширдим, шундагина коронавирус аниқланди. Тестларга ишонманглар, иссиғингиз чиқиб, ҳолсизликни ҳис этсангиз, даволанишни бошланг», — дейди хонанда.
Шунингдек, Муниса Ризаева ҳозирги вақтда касалхоналарда аҳвол танг эканлигини, шифокорлар етишмай, одамлар коридорда ўлиб кетаётганини ҳам айтиб ўтди:
«Мен бир нарсани айтаман: Шифокорлар жуда ҳам кам, ҳеч ким ҳеч кимга қарамаяпти, одамлар ўзи даволанишга мажбур бўляпти. Менга кўпчилик ‘Сизнинг пулингиз кўп, шунинг учун ота-онангизни касалхонага ётқиздингиз, ўзингиз ҳам ётдингиз’ деб айтяпти. Бугун пул ва таниш-билиш ҳеч нарсани ҳал қилмаяпти. Мен ўзим кимларга қўнғироқ қилмадим, адам ва онам оғир, ёрдам беринглар деб. Лекин ҳеч қандай танишларингиз сизга ёрдам бермаяпти. Муниса Ризаева бўласанми, ҳоким ё вазир бўласанми, ҳеч ким бир-бирини эшитмаяпти. Вирусолог ва пулмонологлар ҳеч ким бир-бирини эшитмаяпти. Бир кунда кичкина касалхонага 1000-2000 касал келяпти. Одамлар коридорда ўлиб кетяпти. Шунисини айта оламан, мен лекин. Чунки бу нарсани мен ўзим кўзим билан кўряпман. Ҳеч нарса ҳал қилинмаяпти. Кўп одамлар қийналганидан ҳам ўлиб кетяпти. Керак бўлса, бутун республикада аппаратлар кам, касаллар эса кўп. Кўпчиликка раҳмим келяпти. Лекин айб врачларда эмас, давлат раҳбарларида ҳам эмас. Улар жисмонан улгурмаяпти. Шифокорлар кам, касаллар кўп. Ҳамма бир вақтда касал бўлиб қолди, дунё бунга тайёр эмасди.
Ким касал бўлмаса, илтимос уйдан чиқманглар. Ўзингларни, ота-оналарингни асранглар!», — дейди Муниса Ризаева.
Хонанданинг айтишича, ота-онасининг аҳволи оғир. Унинг юрагида муаммолари бўлган отаси ҳозирда уйда даволанмоқда, онаси эса касалхонада қолмоқда.
Изоҳ (0)